El viaxe a la lluz, la novela gráfica cola que Ruma Barbero ganaba a finales del 2015 el Premiu "Alfonso Iglesias" de Cómic, supón un saltu cualitativu notable na narrativa d'esti autor nacíu en Somió, Xixón, en 1971. Si yá con "Manzajú" (Primer premiu "Alfonso Iglesias", 2009) llograba convencer retratando unos cachinos de la so propia vida y les sos convicciones culturales a partir de les alcordances que-y despierta'l refrescu embotelláu de mazana, cola "Chelita" (Premiu Tertulia Malory al meyor llibru n'asturianu, 2012) ofrecía un documental sobre la esperiencia de cooperación, a primeros de los años noventa, nel Salvador que dexaba atrás la guerra civil. Ente una obra y otra Ruma Barbero foi entregando páxines fondamente humanes del so día día, a la manera de relatos curtios o cásique microrrelatos, resueltes con oficiu y con arte; puen vese nel blog "Aguantando cachones" o na páxina "moyandolculu.com".
La historia del Viaxe a la lluz empieza nos años cincuenta en Casu. Un matrimoniu de campesinos, Antón y Felisa, atopa ente unes ablanales el cadabre d'un fugáu. Ensin avisar a les autoridaes entiérrenlu en monte xunto col fusil. Eses primeres páxines son lluminoses, a tou color. Como si la muerte d'un lluchador contra la dictadura apagara la lluz, el cuerpu central d'esta novela gráfica usa dos tintes principalmente, una de tonos azulaos pa les histories que pasen de nueche y otra de tonos marrones pa lo que sucede pel día. Una lluvia constante empapa bona parte d'estes páxines. Pelos caminos del monte transiten los vecinos que van o vuelven del trabayu, pero tamién la guardia civil qu'intenta dar caza a los últimos fugaos aprovechando'l mieu que despierta la so presencia amenazante. La rutina vese alteriada cuando se sabe que retorna d'América un emigrante; les fuerces vives supónenlu ricu y tán dispuestos a recibilu como a unu d'ellos. Pero Tante vuelve feliz y probe, contentu de dexar atrás una vida de trabayos con pocu rendimientu. L'emigrante trai revistes americanes (vuelve la lluz y el color a la novela gráfica) que tol pueblu llee o mira y qu'afala la inventiva de los más mozos. Cerca yá del final, la historia de los fugaos zárrase tráxicamente nuna páxina en blanco y negro (la 126) cola guardia civil acarretando un cadabre; como contraste, na páxina siguiente los más mozos repiten viñeta a viñeta los mesmos xestos, solo que caminando contra la lluz a probar, na mar, una tabla cola que deslizase sobre les foles construida siguiendo los planos d'una d'aquelles revistes llegaes d'América
Como en tantes otres de les histories que nos cuenta, Barbero echa mano de la memoria social, d'aquello que se diba tresmitiendo oralmente y en voz baxo na cocina familiar, pa construir una novela gráfica sobre la sociedá asturiana qu'intentaba dexar atrás les consecuencies de la guerra civil y que facía por caminar hacia un futuru inciertu, pero esperanzador. Ye verdá que'l tratamientu que fai de dellos temes (la homosexualidá, la improbable bondá d'un mandu de la guardia civil...) son más propios del nuesu tiempu que de la posguerra rural, pero l'atención a los detalles d'esti dibuxante, la capacidá que tien p'armar vides coles que resulta fácil identificase, emocionase inclusive, supérase nesta obra ofreciendo un relatu mui bien estructuráu a partir d'un escelente guión; les distintes histories entellazaes va resolviéndoles con un llinguaxe de cómic inequívocu (páxines enteres de dibuxu solu), ensin necesitar l'apoyu de la palabra pa contextualizar la narración. El viaxe a la lluz ye una obra yá de madurez, redonda.
