De xuru que los dos poetes, Carlos Suari y Vanessa Gutiérrez, qu'arropen a Berto García na salida del so nuevu llibru de poemes, Esconderite, nun se punxeron d'alcuerdu, pero los dos coinciden nos testos qu'escriben en vincular el títulu d'esta obra col esconderite inglés, esi xuegu que consiste n'avanzar ensin que quien queda te garre moviéndote cuando se vuelve. Carlos Suari, na solapa delantera, trai unos versos propios que sirven tanto pa referise a la creación lliteraria como a la vida: "Que nun te vean. Camina, nun apares. / Avanza hasta la muria señalada, / caltién la postura como un mimu / y dexa ensin aliendu al to alversariu". Vanessa Gutiérrez, nel testu que pieslla'l llibru, fai alcordanza d'un poema del catalán Joan Margarit, "Los muertos", nel que la vida ye como'l xuegu del esconderite inglés, un dir averándose a la muria onde inda suenen los güelpes de la muerte d'aquellos a los que quixo. Sicasí, en lleendo'l llibru que García nos entrega da la impresión de que'l xuegu al que se refier el poeta de Corvera ye más bien l'esconderite tradicional, esi sitiu nel qu'escuendes hasta que puedes alzar la maya nun descuidu de quien la guarda. L'esconderite como abellugu, como llugar onde quedar a sotechu de la realidá hasta que la vida nos atopa y nos obliga a enfrentanos a ella. L'esconderite como llugar pa la creación, como abellu lliterariu.
Berto García (Les Vegues, Corvera, 1973) ye maestru d'enseñanza primaria, militante pola recuperación de la cultura d'espresión asturiana y un poeta que lleva más de diez años publicando, discreta y constantemente, una obra escrita col corazón. Ensin otra sida foi el so primer llibru, del 2005, y cuenta yá con un par de premios: el "Fernán-Coronas" de 2007 (Manual contra'l vacíu) o el "Novo Mier" del 2009 que convoca l'Academia de la Llingua Asturiana (Cuando'l mundu debala). Una bona amuesa d'esa militancia cultural y del espíritu integrador qu'anima a Berto García ye l'antoloxía qu'organiza en 2014, Contra'l silenciu, un arrogante repás pela poesía asturiana del Surdimientu fechu más cola idea de sumar nomes y palabres que d'establecer cánones o d'esbillar ente escueles y tendencies o calidaes.
Esa mesma xenerosidá úsala García consigo mesmu, cola so propia obra. La suya ye una poesía que se caltién a lo llargo del tiempu, pela media docena de llibros que tien publicacos, con mui poques variaciones, fiel a una dicción escueta, a una adxetivación mínima, onde prima'l sentimientu sobre la forma de la mesma manera que la idea primordial, la reflesión, sobre'l ritmu. Quiciabes pudiéramos destacar cómo ente los primeros y los poemes últimos foi afilándose'l conteníu, escarnándose, como si Berto García fuera un tímidu discípulu de Juan Ramón Jiménez que desnudara la expresión en busca de lo esencial, anque a veces cuerra'l riesgu de qu'al llector-y resulte difícil saber pa ónde empobina. Esconderite consta de venticuatro poemes, unu por cada una de les hores del día, según esplica l'autor na nota qu'abre'l llibru. Esa cenciellez espresiva de la que falamos, que construye cada poema alredor d'una idea base (una tormenta, el pasu del tiempu, la mancadura de la vida, la guerra, la ivernada, la mentira...), arrópala'l poeta depués con cursives, con palabres ente paréntesis y corchetes, con espacios en blanco que'l llector necesita enllenar pa que'l poema se complete. Una y bones fechu, como diz Vanessa Gutiérrez, "la lliteratura, nesti casu la poesía, ye esconderite y supervivencia".
