La presentación n'Uviéu, na Biblioteca d'Asturies, de la edición facsimilar de la revista Jugar con Fuego reunió a un heteroxeneu grupu de persones alredor del so director, José Luis García Martín: miembros de la tertulia Jueves Literarios d'Avilés, de la tertulia Oliver nes sos sucesives promociones o representantes de tan distintes maneres d'entender Asturies como Josefina Martínez y Xurde Blanco. La casualidá xuntónos ellí, tamién, a Julio César Iglesias y a min. Cásique cuatro décades atrás, nel branu de 1978, Iglesias, estudiante de bachilleratu, vieno a Uviéu pa conocenos y falar de poesía. Un añu enantes llegara yo dende Tuña con vocación de poeta y ganes d'entrar en contactu cola lliteratura viva, que buscaba enquivocadamente na Universidá y nes biblioteques. Frente a la mio desorientación y desinformación, quien depués fexo una brillante carrera de periodista falaba de novísimos y venecianos, de Villena y Gimferrer, de Brines y Colinas, xente de la que yo nada sabía.
De parte tarde, p'apurar la maxa del momentu, acompañélu a la estación del ALSA que taba nos baxos del singular edificiu que diseñó Castelao. Na penumbra de la dársena d'Avilés un únicu viaxeru esperaba recoyíu sobre él mesmu y sobre unos llibros que llevaba na mano. "Mira ehí a José Luis García Martín", dixo Iglesias. "¿Quién?", dixi yo, qu'oyía per primer vez aquel nome. Esplicóme que dirixía dende Avilés la meyor revista crítica d'España, Jugar con Fuego, onde firmaba con distintos nomes toles colaboraciones qu'aparecíen. Al día siguiente, llunes, a primer hora, compraba yo n'Ojanguren el volume III-IV de la revista y, lleéndola, empezaba a tirar del filu de l'actualidá: Valente, López Luna, López Gradolí, Lupiáñez... Y d'una poesía bien distinta de la que yo avezaba a lleer: "Te lo quitaron todo, / y desnudo acaricias / tu soledad tan sólo"; firmaba Bernardo Delgado.
Acierta Abelardo Linares al rescatar agora, n'edición facsimilar, esta revista. Como señalaba Antonio Fernández Insuela na presentación, refieriéndose al valor de los estudios críticos qu'alcontramos nella, porque vien a ocupar un sitiu d'honor ente les más destacaes revistes de la historia lliteraria española qu'ameritaron yá reproducción facsimilar, pero tamién polo que representa na traxectoria creativa del director. Quien, pa un llector desatentu o interesáu, diba terminar personificando la defensa de la poesía figurativa, empezara'l so camín lliterariu en 1972 con un llibru, Marineros perdidos en los puertos, ensiguida refugáu por él, y que se pue adscribir a la corriente poética del conocimientu más qu'a la comunicativa, por usar la terminoloxía al usu. Y la transición ente aquella poética y la poesía posterior ta nes páxines de Jugar con Fuego: si los sonetos del heterónimu Pedro Tordasens colos qu'abre'l númberu 1 se puen relacionar con aquel primer llibru, nos que publica baxo los demás heterónimos (Alfonso Sanz Echevarría, Luigi Durutti...) o los que firma col propiu nome yá reconocemos al poeta d'Autorretrato de desconocido (1979).
Un prólogu axustáu y intelixente de Pablo Núñez desvela lo qu'hai de verdá y de mentira nes colaboraciones reales y nos xuegos d'heterónimos y apócrifos (na revista hai poemes que firmen Andrade, Brines, Botas, Villena... escritos pol director); compartimos el diagnósticu final de Núñez: en Jugar con Fuego "García Martín comenzó a configurar -y en cierto sentido a inventar- el particular mundo literario que todavía hoy le rodea".
