El trabayu investigador de Justo García Sánchez trai dos novedades del mayor interés pa la lliteratura asturiana: dos poemes inéditos d'un autor desconocíu del sieglu XVII. Como se sabe, la nómina d'escritores n'asturianu d'esi sieglu ye mui curtia, limitándose hasta agora al Príncipe (nel sentíu etimolóxicu de primeru o aniciador) Antón de Marirreguera (h. 1605-h. 1662), a un tapecíu Bernardino Robledo o Reboredo, autor d'entremeses desconocíos, y a Francisco Bernaldo de Quirós, del que tenemos n'asturianu'l llargu romance "El caballu" compuestu hacia 1707; estos dos autores yá viven ente los sieglos XVII y XVIII. De qu'hubiera otros autores nel XVII yá nos avisa González de Posada al falar de Marirreguera en 1794, cuando se refier a otres composiciones d'aquel tiempu: "Así se le atribuyen casi quantas se conocen, aunque con poca justicia". Yera evidente que les obres que nun fueran de Marirreguera habíen ser d'otru o otros autores de los que nun teníemos noticia.
Nes Aportaciones a la cultura asturiana del siglo XVII, García Sánchez da datos bien interesantes sobre la vida y obra de los xesuites y Asturies (ente otros, sobre l'obispu Ambrosio Ignacio de Spínola y Guzmán y sobre'l doctor Matías Gregorio de los Reyes Valenzuela, estremeñu, del qu'ofrez tamién delles composiciones n'español y testimonios sobre l'actividá lliteraria del so tiempun n'Uviéu). Pero ye especialmente relevante l'epígrafe que dedica al hermanu xesuita Juan o Xuan García de Prada. Nacíu en Villar de Cienfuegos (Quirós) hacia 1600-1601 y muertu enantes de 1675, publica d'elli dos composiciones manuscrites que se guarden na Biblioteca Colombina de Sevilla. La primera ye un "Romance a la entrada del Illustrísimo señor D. Ambrosio Ignacio de Espínola y Guzmán" cuando esti toma posesión del obispáu d'Uviéu nel hibiernu de 1665, cuando se fecha'l poema. La otra composición (escrita hacia 1666-67) fórmenla doce octaves reales "cuio assumpto es un asueto que dio el Illustrísimo señor D. Ambrosio Ingacio de Espínola (...) a los Artistas de la Compañía de JHS del Collegio de Oviedo".
Nun son, nenguna de les dos, obres que destaquen pol altor nin pola ambición creativa, son de circunstancies, utilicen les estrofes esperables nun testu asturianu d'entós (romance y octaves reales) pero ufierten suficientes novedaes como pa celebrales: aporten un nome nuevu y desconocíu, ruempen la hexemonía lliteraria que pa los sieglos XVII y XVIII conformaba un triángulu colos vértices na rodiada del Cabu Peñes (Carreño), Villaviciosa y Nava (cola escepción uviedina de Bernaldo de Quirós) y ofrecen un asturianu interesante, con dalgún occidentalismu, pero dientro de la tradición escrita que conocemos; seique seyan los testos lliterarios más antiguos orixinales que conservemos, una y bones de Marirreguera nun tenemos nada del so tiempu.
Per otra parte, esta ayalga reafírmanos en dalgo que venimos defendiendo dende hai tiempu: que de la lliteratura escrita nesta llingua namás conocemos la punta del iceberg, lo que nos tresmitió Caveda o pasó peles sos manes, lo qu'investigaron Canella o Españolito. Fai falta entrar nos archivos públicos y privaos y buscar de manera exhaustiva los testimonios escritos d'una cultura, l'asturiana, que se tresmitió, hasta época mui recién, en manuscritos. Tengo l'esfotu de que nos esperen más sorpreses prestoses como esta qu'ofrez García Sánchez.
