En mayu de 1980 convócabase'l primer Día de les Lletres Asturianes, una celebración convertida en Selmana que lleva trenta y ocho años presente nos medios de comunicación y na propia sociedá. Col tiempu esti acontecimientu foi variando'l modelu, pero moviéndose siempre ente la reivindicación política y la conmemoración llingüística. A partir de 1989 intentóse que respondiera al nome dándo-y un pesu mayor a lo lliterario. Naquella décima convocatoria cumplíense ciento cincuenta años del primer llibru n'asturianu, la Colección de poesías, de Caveda, y la Conseyería de Cultura decidió empezar a dedicar la Selmana a autores fallecíos; el primeru foi, como bien lo ameritaba, Caveda y Nava. Reeditóse la Colección, salió un llibru cola so poesía, púnxose una placa conmemorativa na so casa natal de la Villa, creóse d'alcuerdu colos llibreros d'Asturies el Día del Llibru Asturianu, editóse un primer "llibru regalu"...
Nun yera un formatu orixinal; dende 1963 Galicia celebraba'l Día das Letras Galegas dedicándolu a un autor o autora ( Rosalía de Castro foi la primera); pero la idea ye tan eficaz qu'hasta los catalanes la copiaron pa festexar, baxo la etiqueta "añu de" y miles d'iniciatives, a los sos clásicos. Estes celebraciones asturianes permitieron recuperar la vida y la obra de munchos autores baxo l'impulsu de Cultura: Cuesta, Pría, Acebal, Melás, Fernán-Coronas, Canellada, Marirreguera, Xosefa Xovellanos, Cabal, Rubín, Losada, inclusive contemporanios como Xosé Antonio García o María Teresa González; ensin esi estímulu institucional diba ser difícil mover voluntaes, abrir archivos, consiguir que s'editara en tiempu y forma una obra munches veces oculta. Sicasí, cambiar el modelu y organizar la Selmana de les Lletres d'otra manera ta nes manes del responsable políticu de cada momentu y a lo llargo d'estos años ensayáronse otres fórmules: una selmana dedicada a la poesía contemporania, otra a la narrativa y otra al teatru rompieron la secuencia de nomes propios hai dalgo más d'una década. Recuperada otra vez, nos últimos años optóse por una celebración más escolar que lliteraria, desdibuxada, hasta que nesti 2017 s'optó por una Selmana otra vuelta colectiva, la de les muyeres qu'escriben y escribieron n'asturianu a lo llargo de la historia.
Anque hai qu'entender y apreciar la bona intención que llate detrás d'esta dedicación, la verdá ye qu'a mio xuiciu visibilízase más el papel que xuega la muyer considerando la so contribución de manera individual más que colectiva. ¿Por qué non una Selmana a Ángeles López Cuesta, Teresa Villaverde, Florina Alías o Eva González ente les yá fallecíes? Edítase pa la ocasión una antoloxía-catálogu de testos n'asturianu y gallego-asturianu escritos por noventa y dos muyeres de mui distinta calidá y intención. Recupera nomes alloñaos dende hai años del primer planu lliterariu y ofrez novedaes. Pero ¿son toes les que podíen tar? Ta claro que non, nin antigües nin contemporanies: echamos de menos a Josefina Alonso, Pilar Junco, tol grupu de muyeres escritores de L.laciana (siguidores d'Eva González, que sí ta). Pero falten contemporanies, dalgunes imprescindibles como Victoria Veiguela o Carme Martínez, o esos nomes qu'asomen y desaparecen alredor de la revista "Lletres Asturianes": Dora Barrial, Dora Vigil, María Xesús Llope, Xuani Pérez, Carmen Belén Jiménez... Quiciabes una antoloxía con menos vocación de catálogu, menos democrática, y con una amuesa lliteraria más representativa (nomes imprescindibles y más obra) permitiría al públicu facese una idea más precisa de cómo foi y cómo ye, del altu valor que tresmite, la lliteratura escrita por muyeres nesta llingua.
