Nun ye la primer vez que Xulio Arbesú (L'Entregu, 1957) s'adientra nel xéneru de la novela histórica y na dómina de la monarquía asturiana. Fíxolo con Potestas (Vtp, 2003) y repite agora con El valor del rei (Trabe, 2017). En dambes ocasiones algamó'l "Premiu Xosefa Xovellanos", escribiendo del medievu asturianu con maestría. La temática, anguaño mui de moda nel cine y na lliteratura, ta consiguiendo un ésitu de públicu global y ye natural qu'un novelista de raza como Arbesú la encare con gana, soltura y erudición.
El puntu de partida ye la muerte de Fruela I y la situación vacante del tronu, a espenses de los votos de la curia de condes godos que decidía sobre una monarquía que yera daquella electa y non hereditaria. La eleición d'Aurelio enraxona a Mauregato, qu'entama una ofensiva con un avance dende tierres de Cantabria. Asistimos entós al tiempu de llucha y de duda ente los dos homes qu'aspiraben a facese col tronu d'Asturies. Nel mediu, Adosinda, que quier más al primu qu'al hermanu y queda a la vera d'Aurelio. La ficción lliteraria abelluga dos estayes: d'un llau, la versión de la crónica histórica amañada con curiosidá pol escritor y autorizada pol resultáu que se conoz de la historia oficial y d'otru, les intrigues personales ente los miembros de la corte nel tiempu compartíu por Aurelio, Silo y Mauregato. Tenemos nes manes una novela de personaxes y d'acción, contada a capítulos alternos poles voces en primera persona de los tres protagonistes: el relatu d'aprendizaxe d'Aurelio, un home retratáu como bonu ya cobarde, al que nun-y da más ser rei y hasta siente repelús de tocar la corona, pero que va medrando n'actitú y aptitú pa desempeñar el so papel; el contrapuntu pal calter del anterior ye'l bastardu Mauregato, un aspirante podre d'ambición por llevar la corona, pero qu'inda va tener qu'esperar a que-y llegue'l so momentu; y la presencia poderosa d' Adosinda, una muyer a la que la familia-y demuestra muncha condescendencia y que de xuru diba ser un bon rei, pero que ta condenada a ser un personaxe secundariu nesa sociedá, teniendo que conformase con una historia d'amor y sexu con Silo y con ser la cuidadora del sobrín, el futuru rei Alfonso II. Caún d'ellos por separao, pero nuna llinia que supo xuncilos con habilidá, confiesa les tensiones del momentu que-yos tocó compartir. Nun van tar solos: hai dalgunos secundarios fuertes, interesantes y bien trabayaos: Silo y la so evolución hasta colocase per delantre d'Adosinda; la frialdá de la reina Velasca, l'almirable fidelidá de Tonio y la intelixencia del mismísimu Beato de Liébana, que-y val, amás, pa sacar el tema del celibatu. Completa la historia la mui cercana y afayadiza descripción d'ambientes que tresporten a los llugares d'Asturies de tantos sieglos atrás; el llector conoz mui bien esi paisaxe pel que cuasi solo pasó'l tiempu: siendes, caminos y montes con nublina, agua y nieve, -hasta presta que llueva siempre-; los pueblos de cencielles cabañes fumiantes, el descansu en xergones de felechu o llana; paisanos en madreñes y bebiendo sidra; reconocemos bien a esa xente probe y temeroso de Dios, los antepasaos llenos de supersticiones que "creen más nun diente de llobu que nuna cruz".
El valor del rei engancha dende'l principiu, arma una bona trama y consigue, semando la tensión y la intriga, que l'interés del llector se caltenga, sollerte, hasta'l desenllaz final, con una llectura rápida y prestosa, gracies a un testu bien escritu y chiscáu de guapes espresiones coloquiales. Ye prueba de la bona salú de les lletres asturianes, una vez más en sintonía y a l'altura d'otres lliteratures del mundu.
