El nuevu númberu de la revista Formientu axunta dos circunstancies que lu faen especial: un cambiu na direición - despídese Inaciu Galán y dexa pasu a Claudia Menéndez y Diego Solís- y una edición xuncida a la VII Xunta d'Escritores Asturianos, qu'aconceyó en Villaviciosa'l pasáu mes d'ochobre, después de trece años sin celebrase. Nestos once años de camín, la revista foi convirtiéndose nuna publicación de referencia onde alcontrar los anicios del futuru y el rumbu creativu pel qu'anda la mocedá; les páxines de Formientu siempre valieron pa lleer a los autores más mozos de la lliteratura asturiana, dalgunos dellos yá bien consolidaos güei como escritores.
Nesta ocasión son trenta y dos los nomes qu'apurren les sos collaboraciones lliteraries; autores mozos y mui mozos, nacíos nes décades de los ochenta y noventa -dalgunos inda son estudiantes-, igual númberu d'homes que de muyeres, la mayoría con orixe nes zones urbanes d'Asturies y promotores o participantes, amás, d'otres manifestaciones sociales, culturales y artístiques como la música, los recitales poéticos y otros espectáculos escénicos. Unos pocos son conocíos polos llectores y yá cuenten con presencia reconocida o editada, pero la mayoría son nomes nuevos que tienen equí la oportunidá de facer la so presentación lliteraria pública. Si bien ye verdá qu'hai temátiques diverses, rescampla como habitual y favorita la de la esperiencia personal, pasando tamién poles vides y los personaxes familiares, la memoria de la Guerra Civil o la desigualdá del mundu nel que vivimos. Con poesía: Claudia Lueje, Verónica Canel Álvarez, Jesús Garmón, Irma González-Quevedo Pedrayes, Ánxela Gómez d'Ávila, Aida Escudero, Pablo M. Testa, Diego Solís, Andrés Astur Treceño García, Raquel F. Menéndez, Beatriz Menéndez, Francisco Priegue, Inaciu Galán y González, Marina Pangua, J avier Cayado Valdés, Margarita García Pellejero, Illán Pereda col alcuñu d'Hortensia, poeta asturiana, Nacho Iglesias "Wings", Borja Riestra Camacho, María García Díaz y Andy da Silva. Na estaya narrativa: Alberto Alonso Lada, Raquel F. Menéndez, Blanca Fernández Quintana, Solinca Turbón, Alba Carballo, Xaime Martínez, Naomi Suárez González y los testos ensayísticos escritos por Javier Cubero, d'actualidá política nacional y rexonal y col recuerdu a la figura de Xuan María Acebal. Complétase la publicación coles tornes feches por Francisco Priegue, de Félix Francisco Casanova; Clara Vallejo Cotarelo, de Seamus Heaney; Claudia Elena Menéndez Fernández, de Borges; Susana Maseda Rivas, d' Eumenio González Rodríguez y pa zarrar, Matthew Stephen Stuckwisch, el collaborador americanu que traduz a Mark Twain. Les semeyes de Pablo Casanueva y les ilustraciones de Marcos Martínez Fernández acompañen a los testos. D'ente toos, calidá mui diferente: yá hai poetes que consiguen calibrar bien la so voz y que saben tresmitila con eficacia, en bonos detalles o inclusive en bones composiciones; hai narradores que resuelven bien l'oficiu y acierten na trama y nos personaxes, con histories que merecen atención. Y n'otros casos hai qu'esperar por una muestra más representativa o más afortunada.
Valen les palabres de Raquel F. Menéndez como declaración d'intenciones pa toos ellos y pa los llectores: "Detrás d'estos poemes que comparto hai un cuerpu qu'escribe, distintu del so protagonista y también de los que lleen. Tienen en común l'inconformismu, la fe nuna llingua vilipendiada pola historia, la necesidá de movese fuera de los moldes impuestos. Tienen los brazos llargos y los güeyos bien abiertos. Por eso, estos cuerpos que son, sienten y s'espresen n'asturianu son abondo fuertes como pa salir de sí mesmos y pasar al ágora".
Ye necesario que'l lleldu del futuru siga amasando lliteratura en Formientu y la revista tien que gramar, sollerte, pa que les páxines sigan llenándose de xuventú y de calidá.
