En 2011, cuando Pablo Antón Marín Estrada publicaba Despidida, pocos creímos definitives les palabres finales, nes que tarrecía la posibilidá de volver a publicar, y más nesta llingua. Nun digo que nun lo pensara nel momentu d'escribiles, pero esi renunciu a la escritura resultaba pocu convincente en quien ye'l prototipu d'escritor de la Segunda Promoción del Surdimientu. Por suerte pa la lliteratura asturiana Marín Estrada ye un escritor puru, de los que necesita embrocar pal papel tanto les sos pulsiones vitales como los moliciones intelectuales, independientemente de que tenga seis o seis mil llectores (non en devanéu ye, polo que sé, l'únicu escritor asturianu que lleva un diariu). Nestos últimos años esti autor alcontró nel periodismu una salida profesional, y anque se diga que ye un trabayu incompatible cola creación lliteraria, parez qu'a Marín Estrada lu reconcilió cola llingua y col oficiu, p'allegría de los que lu venimos lleendo y almirando dende los primeros trabayos.

La tierra y el cielu ye l'últimu llibru de poesía que publica, onde xunta ventinueve poemes n'edición bilingüe nos que vuelve a los temes esenciales de la so obra (el pasu del tiempu, la soledá y la compañía, l'amor y el deséu, la historia, el paisaxe y el paisanaxe...), agora dende la esperiencia de vida y, quiciabes por ello, dende la desolación. Asina, quien meyor retrató nos primeros poemes la lluminosidá de la naturaleza, quien alcontraba guapura nuna escombrera, quien celebraba la llibertá de la infancia ente la ferralla industrial y l'óxidu que lo diba apoderando too, duelse agora del abandonu d'esos mesmos caminos, del pasu del tiempu. Xusto nel centru del llibru Marín Estrada coloca un poema que se titula "Allegría", nada celebratoriu; sírve-y pa echar en cara a esa emoción les zunes qua trai arreyaes a través de palabres como estes: fríu, requexu inmundu, desafayadizu, infiernu, garitu, llepre, corazón furruñosu..., quier dicise, un sentimientu mui pocu xubilosu.

Destaca na parte final del llibru la voz que cede'l poeta a dellos personaxes: l'emperador Adriano cerca yá del final ("La vieyera ye esti fríu / permanente en cuerpu..."), Telémaco preguntándose si'l padre siguirá vivu, Víctor Botas que regresa a la playa de Salinas a caminar con Keats mientres mira pa una moza roxa que se baña na mar... Pero tamién otra xente anónimo, personaxes femeninos, como esa "muyerina" empeñada en señalar, en ficies de la memoria d'un nenu que foi testigu, una "Fosa común" en monte ("La infamia ye una respuesta ensin pregunta"), o les "Vildes de guerra", "soldaes desarmaes /ensin el prestixu de la lleenda", condenaes a tresmitir lo que pasó: "Mientres toos amedranaben / vosotres / callando, siguisteis falando". Quiciabes el poema más singular del conxuntu ye'l qu'abre esti llibru, "Surdimientu", llargu y reflesivu, nel que dialoga con Xuan Bello y con él mesmu cola sida d'una llectura de poemes del de Paniceiros, y onde reflesiona, poniendo voz a la so xeneración, sobre creatividá y fracasu de la escritura nesta llingua: "lo nuestro yera deprender, pensar, escribir / ... / les úniques palabres coles que se podía falar / a los muertos y que los muertos nun entienden". Como la Ítaca de Kavafis, el Surdimientu, estes décades de desendolcu cultural, ye'l "viaxe que s'entama, / non por deséu de quedar y perdurar", sinón "por convencimientu de ser y tar plenos / nel llabor" d'escribir n'asturianu.