Si hubiera que buscar un filu conductor al últimu poemariu de Xaime Martínez, ensin dulda Irlanda y la eternidá caminaríen xuntos, garraos d'una metafórica mano de poemes y alcordances. Per un llau, Irlanda ta presente como telón de fondu o como argumentu. Per otru llau, Hibernia furrula como mecanismu de cuestionamientu y reflexón sobre'l tiempu y la edá. La madalena de Proust vese sustituyía equí por un paisaxe irlandés, una clase universitaria (como en "La batalla") o una paya pa sorber el zusmiu (nel poema que cierra'l llibru y da títulu a la obra). L'autor apaez inquietu nestos poemes, como si fora consciente de que'l viaxe a tierres estranxeres significa tamién degolar un pilancu de madurez. Nun ye xera fácil, y resulta satisfactorio que Xaime Martínez sía quien a superar l'envite.

Siendo un poemariu sobre'l percorríu vital de dalguién mozu, Xaime Martínez amosa una seriedá ablucante de plantegamientos y conclusiones. Entiende'l so llugar nel mundu. Asume la responsabilidá como heriede de tolos que foron enantes qu'él. Por exemplu, nel poema "Ensin raigañu", onde denuncia'l vafarientu futuru que-y esperen a los sos fechos y acciones. Qué quedará del poeta y d'a quien ama ye cuestión qu'esmolez abondo a Xaime Martínez. Nel poema tituláu "Aere Perennius", son los güeyos verdes de la moza lo que durará más que'l bronce. La eternidá como tema poéticu trátase dende una visión clásica que remite a Horacio y a Jorge Manrique. La infancia yera aquel escenariu de risa imprevista que prometía los brotos d'una nueva primavera, la felicidá mesma. Amás, nesa infancia'l poeta atopa les referencies necesaries p'abordar el futuru siempre sobre la clave de la inmortalidá o finitú de la vida y la obra. Nel últimu poema, una paya de metal, cola que se toma'l mate n'América, sirve de catalizador del llazu que xunce a les distintes xeneraciones que vinieron enantes del autor coles que lu siguirán: "Quiciabes esi trozu metal contenga en sigo / mesmo, como un aleph, toles miseries / y gozos del que marcha".

Pa componer Hibernia, Xaime Martínez sema de referencies heteroxénees el testu. Peles páxines d' Hibernia pasa Ronsard ("Cependant qu'êtes belle"), Pessoa ("O fingidor"), Horacio ("Aere Perennius"), o Nietzsche ("L'amor fati"). Pero tamién podemos alcontrar a la princesa Leia y Tatooine de Star Wars, el Bob Dylan de "Like a Rolling Stone", o a Emma Watson (Hermione en Harry Potter). Y atopamos metáfores tan afortunaes como esi "llobu gris del iviernu", el "desagüe lentísimu del alba", o esos versos guapos que dicen: "Con un xestu ordenabes / (un respigu, un tremor) / los mil cachos del mundu".

Hibernia ye un llibru de señardá positiva, peñerada pola Irlanda del crecimientu personal, onde l'autor respeta lo bono y lo malo cola fatalidá de lo inevitable. Anque yá tenía nes llibreríes El tango de Penélope (2012), Los tres mil cuentos de Marcelino Tongo (2012, a comuña con Diego Álvarez Miguel) y Fuego cruzado (2015), apruz n'asturianu con una obra sólida, académica a veces, con un estilu que suena a otros yá lleíos, pero que nun desmerez habida cuenta la mocedá del autor. Xaime Martínez firma un llibru pol que paga la pena sigui-y el rastru.