2017 foi crucial na andadura lliteraria d' Aida Escudero (Uviéu, 1985), una autora prácticamente desconocida hasta esi añu: ganó'l Premiu de Poesía "Fernán-Coronas" con un llibru inéditu anguaño, Esti llugar qu'agora ye nuesu, subtituláu "Poemariu neanderthal". Nesta obra indaga na ficción (pre)histórica d'averase a la existencia de lo que llamaremos pa entendenos sociedaes primitives, qu'Escudero imaxina llibres d'estereotipos y clixés de xéneru, en contactu cola naturaleza nos sos trabayos y díes: la sobrevivencia, la caza, una sexualidá poco normativa o la espresión artística, que la poeta s'ocupa de reivindicar dende una voz de muyer, protagonista de la obra. A finales d'ochobre d'esi añu participó activamente na Xunta d'Escritores de Villaviciosa, onde s'ofició l'alcuentru del Surdimientu coles nueves voces de la creación asturiana, de les qu'Aida Escudero forma parte destacada. Y, por si nun fuera abondo, zarró l'añu ganando el "Asturies Xoven" de Poesía, un certame que se convoca pa obres escrites n'asturianu o castellanu indistintamente, y onde la poesía n'asturianu compite bien: yá lu ganaron Camblor, Gayol o Medina con testos nesta llingua.

Familia con autorretratu al fondu, qu'acaba de publicar Impronta, permítenos averanos a una poeta que se nos presenta mui atenta a la tradición lliteraria asturiana más recién. Parte d'una xenealoxía propia qu'Escudero perfái con nomes de muyer, na que podíen mui guapamente tar los versos de Vanessa Gutiérrez, d' Ángeles Carbajal, de Marta Mori, de Taresa Lorences o de Berta Piñán..., quier dicise, muyeres poetes que se caractericen por buscar na so obra la inmediatez comunicativa a través d'una espresión directa. Pero quiciabes quien más influencia dexara nesta poesía fuera la xixonesa María Teresa González, cola que comparte una manera similar de construir el poema: estructures oracionales relativamente llargues fragmentaes en versos de midida variada, munches veces d'arte menor, qu'imprimen un ritmu rápidu y cadencial a los testos, cercanos al cantar.

Sicasí, esa inmediatez comunicativa de la que falamos -y de la que vien la obra poética d'Escudero- concede mui poco, nesta entrega, a l'anécdota o al relatu. N'apariencia, l'autora constrúi la so poesía a partir d'una realidá visible, d'un instante que paga la pena retener (que tea lloviendo, la soledá, la casa de la güela y determinaos obxetos qu'abren la espicha de la memoria, un rostru que tresciende al tiempu nes sucesives xeneraciones, el nacimientu d'una neña, la presencia tranquilizadora de la madre o la celebración del cuerpu...), pero la resolución práctica del testu camina casi siempre hacia un estrañamientu d'eses certeces, ensin alloñase de la figuración, ensin perder de vista lo cotidiano. Asina, resolviéndose en fragmentos d'emoción y pensamientu, faciendo una rellectura de xéneru nuna reflesión que tresciende de lo propio y particular, descentrando la exa narrativa, esta obra busca'l camín d'una espiritualización poética, novedosa, que s'arriesga a reescribir esa tradición de la que parte d'una manera más abierta qu'otros coetanios suyos. Dende'l pasáu, xuntando cachos dispersos de memoria personal y colectiva, indagando nes vides de la familia, cercanes y ayenes a la vez, Aida Escudero compón un autorretratu que, esencialmente, fala del so presente y mira pal futuru.