La hestoria contemporánea de México vien marcada pola Revolución. Ésta empecipiara nos años primeros del sieglu XX coles guerres pa echar fora del poder a Porfirio Díaz, el más llistu de toos pos coló pa París de siguío au morrió seliquín na cama. Tres d'él aportaron toles figures de les películes que sobro esti asuntu tienen fechu los norteamericanos, Madero, Huerta -esti yera siempres el más malu-, Pancho Villa, Emiliano Zapata, Venustiano Carranza, Marcos García Obregón y dalgunos otros que, por menos importantes, nun m'alcuerdo agora. Toos ellos, menos Huerta que finó nuna cárcel yanqui, morrieron asesinaos, porque la revolución, amás de violenta, yera muy difícil d'iguar. Yera una revolución agraria pero con problemes y enfoques estremaos nel sur y nel norte, amás yera tamién la revolución de los trabayadores manuales de les ciudaes, que los había, de los pueblos indíxenas aínda güei esperando per ella, y tamién de la pequeña y mediana burguesía. Taben amás delles xeneraciones de políticos a los que la llarga xerontocracia de Díaz había-yos torgao la posibilidá de medría. Vamos, qu'aquello yera asuntu pa un milagru y, si l'hubiere, amás, tenía que torear cola ilesia d'un llau y colos Estaos Xuníos d'otru. México tan lloñe de Dios y tan cerca de los Estaos Xuníos que dixera Díaz cuando taba pa embarcar pal esiliu nel puertu de Veracruz.
Dempués d'unos años, unos cuantos presidentes y constituciones, aporten los políticos mexicanos al gran inventu, el PRI, Partíu Revolucionariu Institucional, qu'a min paezme una contradicción absoluta pos si ye revolucionariu ye imposible que seya institucional, esto ye un oxímoron en gramática. Pol camín dalguna gran figura como'l presidente Lázaro Cárdenas que tan bien acoyera los esiliaos españoles tres de la guerra incivil.
Pal 2000 aporta a la presidencia Vicente Fox que, per primera vegada, nun yera del PRI sinón del PAN, Partíu d'Aición nacional. El dominiu del PRI dende entós acabóse, y agora tien que guerriar tamién con el PRD, Partíu de la Revolución Democrática, y con AMLO.
Ésti caberu nun ye un partíu políticu, ye'l acrónimu d'Andrés Manuel López Obrador, que fora gobernador del Distritu Federal y alcalde de la capital con mui bonos resultaos al paecer, y enantes presidente del PRD, que fundara él mesmu y Cuautémoc Cárdenas, el fiu de Lázaro Cárdenas al que fai poco vímoslu apadrinar la comedia de la desapaición d'eta -níegome a da-y mayúscules- nel sur de Francia. Nel 2006 presentóse a les eleiciones presidenciales y too apunta a que-y ficieron un pucherazu de los d'antoloxía. El sistema tenía-y mieu por, supuestamente, ser comunista -dalgunos mentaben a Fidel Castro p'acoyonar- y sacó p'alantre a Felipe Calderón, como Fox del PAN, que queda na hestoria como'l qu'anició la guerra escontra'l narcotráficu ensin que, pel momentu y dempués d'una pila muertos, paeza que la tea ganando'l gobiernu.
Nel 2012 tornó AMLO a presentase y esta vegada ganóles el PRI con Peña Nieto y tamién con acusaciones de compra de votos y otres trampes. El casu ye que pal 2018, en xunetu, tenemoslu otra vegada na engarradiella eleitoral, en tiesta de MORENA, Movimientu pa la Reforma Nacional, y de nuevo López Obrador marcha en tiesta de toles encuestes con muncha diferencia sobro los otros. Con MORENA van tamién en coalición el PT, Partíu del Trabayu, y el PES, un partíu evanxelista. Paez nidio abondo que México necesita un cambiu radical, l'estáu mexicanu vien amosando que tien una resistencia grande pero la guerra escontra los carteles de la droga y tamién escontra la corrupción tienenlu frayáu. México precisa d'otra revolución, esta vegada pacífica, que de la mano de la llei y de profundes reformes sociales tire p'alantre un país xigantescu, descomanáu, enllenu de contrastes y con una pergrande población de xóvenes que necesiten una esperanza pa un futuru meyor. Esta esperanza pue venir de la mano de AMLO, o non. Vamos ver que ye lo que pasa'l primeru de xunetu.
