Esti mes d'avientu foi diferente a otros. La carrera política pa ganar les eleiciones, que yá ta no más pindio de la cuesta, va camín de llegar a la meta. Llueu soportaremos los éxitos y les xustificaciones, y soportaremos la publicidá de la Navidá pa que toos seyamos felices. Esti añu el neñu Xesús nun foi prematuru como otros años. Anque ye hasta raro que nun se vea implicáu nesti maratón hacia la Moncloa.
Ye la hora de reflexonar sobre tolo qu'oyimos estos díes de boca de los políticos. Promeses, promeses, promeses y más promeses. Pero habríemos reparar nes promeses que se puen cumplir y sobre too reparar nes que se cumplieron nes llexislatures anteriores o si namás algamar el primer puestu se-yos escaecieron al día siguiente y fixeron tolo contrario de lo que prometieron. La cuestión ye prometer p'algamar la poltrona y como paez que tien pegamín quieren quedase ellí apegaos de por vida, como faen dalgunos. Sí, porque lo malo de prometer ye prometer hasta meter, como diz el refrán, y llueu llega la relaxación y el sueñu fondu y ciegu cola satisfaición del orgasmu de ganar. Por da-y a esti artículu dalgo d'erotismu que ta mui de moda, más qu'unes eleiciones, paecen una ereiciones, si reparamos nos calentones políticos que presenciamos un día tres otru.
Asina, que tal como tán les coses, amas de tolo que nos dixeron estos díes los qu'acaparen los medios de comunicación, que nun fueron tolos partíos por igual, porque pa eso tamién hai privilexos, hemos pensar nos qu'estos años prometieron, prometieron, prometieron. pero... ¿qué cumplieron? Más bien nos fueron tarazando los nuesos drechos, en toles estayes sociales. Recortar hasta los recortes, echar de casa a los más probes, cifres del paru qu'enxamás se dieron na historia, miles de mozos y moces camín del estranxeru porque nel so país nun tienen manera de vida, aumentu de la probeza, trabayar pa nun salir de probe, con sueldos cuasique de llimosna, pensiones conxelaes (¿xubir dos euros en cuatro años ye xubir les pensiones?). Encima tómennos por tontos. Los xubilaos inda sabemos dalgo de cuentes. Y como pica d'esti pastel podre, la corrupción vergoñosa de los que s'enllenaron los bolsos ensin escrúpulos. Perres esfumaes per tolos llaos.
Pero non, non tolos políticos son iguales. Anque haya un cientu de corruptos, hai munchos políticos honraos y que de verdá trabayen y s'entreguen a meyorar la sociedá. Hai muncho desencantu ente la xente, pero inda queda una lluz que podemos prender y allumar esti camín escuru. Qu'esa lluz allume non solo la Navidá, como se suel dicir, sinón qu'iallume'l maxín pa escoyer bien el día 20.
Y acabo con un cachín d'un poema mío, col que yo esti añu vos felicito les fiestes.
"Hai mil ventanas no cielu/que s'abren tolos días/con l.luces nuevas,/
con sueños y estrellas".
La cuestión ye asomase a la ventana que tea bien illuminada y onde veamos un bon paxu de soluciones a tantos problemes que nos afeuten.
Que la lluz allume l'añu 2016, que bona falta nos fai.
