Nun tuvi presente nel l Foru de la Cultura Vaqueira (ou vaquera) celebráu n'El Pividal (Salas), ya bien que me prestaría, pero nun puido ser. Foru al que taban invitaos estudiosos, escritores ya outros representantes de los vaqueiros, esmolíos por falar de la sua cultura. Un grupu d'homes, ya unas poucas muyeres, chenanon cola sua presencia estas xornadas que de xuru s'asemeyanon a un filazón a lo grande.
Aconcéyase esti primer foru de la cultura vaqueira pa falar d'esti grupu que conforma, colos demás habitantes d'Asturias una unidá cultural, con muitos puntos en común ya con poucas diferencias, sicasí bien valoratibles.
Estrañóume abondo que l'Ayuntamientu de Valdés, nun tuviera presencia nel citáu foru, pues yía un conceyu con muitas brañas ya onde ta viva, perviva, la cultura vaqueira, xuncida, eso sí, cola cultura xalda, más que nada porque nun hai grandes diferencias. Too yía cultura asturiana, ya cualquier manifestación venga de vaqueiros o de xaldos contribúi al sou arriquecimientu. En Valdés, como n'outros sitios, hai vaqueiros de muitu rangu, grandes personalidades nel mundu tanto de los negocios como del cine, la música ya, en xeneral, nel mundu del arte ya de los deportes, nel mundu de la ciencia ya en tolas estayas sociales, amás de los que siguen viviendo nas suas brañas, manteniendo con arguyu la sua identidá ya la sua forma de facer las cousas, calteniendo las tradiciones. Yía de resaltar el papel de la muyer na tresmisión de cultura. Por eso las muyeres, vaqueras ou xaldas, tenemos muito que contar nestos nuevos filazones vaqueiros.
Soi una muyer xalda, pero viví rodeada de vaqueiros ya vaqueras, ya viví siempre empapada de la sua cultura que yera mui paerecida a la nuesa. Si me pongo a pensar cuasique nun tengo nada qu'estremar. Salvo qu'el.los practicaben la trashumancia ya los xaldos taban siempre nel sou l.lugar d'asentamientu.. Tamién yía verdá que yá na década de los 60-70 nas brañas de la parroquia de La Montaña, onde you me criéi, poucos vaqueiros facían trashumancia. Yá taba al.lí en retrocesu esta práutica.
Sicasí, na mia casa siempre se falóu del pouco roce ente vaqueiros ya xaldos. Tamién se falaba d'estas cousas naquel.los filazones nos que los nenos tábamos sol.lertes pa escuitar cuentos, ya si yeran picantes inda poníamos más la oreya. Falábase de costumes, ya de cousas d'unos ya outros, de los matrimonios ente vaqueiros, afectaos, por cierto, d'una gran endogamia. Al respeutu, tuvi la paciencia de mirar los l.libros de la ilesia de la parroquia de la Montaña a lo l.largo del sieglu XX, ya pudi comprobar qu'hubo un 14% de matrimonios mistos, teniendo en cuenta que seríen inda más, porque al.lí mamás tán rexistraos los de las mozas xaldas ou vaqueras que firmaron matrimonios mistos na illesia de Belén. Los mozos que buscaron muyer fuera de la parroquia tán rexistraos n'outras ilesias. Las cousas fueron cambiando pa bien ya güei l'amor axunta a vaqueiros ya xaldos ensin nengún tipu de prexuiciu
Nunca lo viví, pero mia buela (1990-1971) contaba cómo no campu Belén había un sitiu pa los vaqueiros ya bail.laban en l.lugares separaos los vaqueiros ya los xaldos. Sin embargu, siendo you mozuca yá nun esistía esa separación d'espacios. Tamién había separadizu na ilesia de Belén, hasta l'arreglu que se feixo nel 1953. Quitóuse daquel.la la raya que los arrequeixaba na parte d'atrás del templu. En del.las ilesias asturianas inda ta la l.linia "prieta" que nun podíen trespasar los vaqueiros.
La Ilesia foi una de las instituciones qu'exerció discriminación con esti grupu, paez ser que por motivos económicos, pola mor de que los vaqueiros vivían un tiempu nas brañas d'iviernu ya outras temporadas nas brañas de branu, ya dizse que nun yeran bonos pagadores del diezmu. Amás paez ser que nun yeran mui prauticantes, namás nas fiestas grandes facían actu de presencia na ilesia, ya nun m'estraña nada, dempués de nun poder travesar la barrera que teníen puesta.
Muncho s'escribió sobre los vaqueiros ya la sua idosincrasia, estudiosos como Acevedo Huelves, María Cátedra, Adolfo García o Ramón Baragaño, ente outros, l.levaron a cabu importantes investigaciones. Sicasí el sou orixe siempre foi motivu de distintas hipótesis. Paez ser que lo que los distingue de los xaldos yía precisamente el prauticar la trashumancia con tolos sous enseres, ya la condición d'arrieiros ya comerciantes con outras provincias españolas. Esta condición foi conformando una forma de ser ya d'entender el mundu que los fixo un grupu diferenciáu, ou polo menos nel que se quixeron ver diferencias culturales, quiciabes alimentadas por outros condicionantes sociales.
Bonos son entós tolos momentos de xuntura que nos l.lieven a las meyores rellaciones y a afondar y preservar tolos elementos culturales que se dan nuesa tierra.
