Pokémon Go ye un xuegu de "realidá aumentada" que fai ver la "realidá real" con elementos de ficción a traviés, nesti casu, del móvil. Y poco más sé de cómo funciona esti xuegu. Los espertos alviértennos del peligru de la revolucionaria aplicación de Pokémon Go, del peligru que supón intentar cazar esti animalucu. Ye que nesti mundu too son peligros. Agora amáguennos tamién los peligros virtuales.
Esto de los videuxuegos píllame yá mui mayor. Nunca m'interesé por ellos, como nun fuera dende la mio profesión d'educadora, siempre sollerte sobre les consecuencies de xugar colos que fueren violentos y de guerra. Nun entiendo mui bien qué ye eso de dir a la gueta de Pokémon y nun sé tampoco si me convién enterame, pero de lo que si toi preocupada, como lo ta muncha xente, y tamién les autoridaes, ye poles consecuencies que nos pue traer la pokémon-manía. Estos díes asistimos a tou tipu de comentarios sobre'l xuegu y lo qu'hai detrás. Mientres buscamos pokémons vamos tar localizaos y el desesperu por alcontralos en dalgún llugar tien otres consecuencies que los que nun somos espertos nesti tema nun somos a comprender. Lo desconocío siempre xenera desconfianza.
Cuando garramos el coche, dende llueu ya sabemos que nun vamos solos pela carretera y que la prudencia nun depende namás de nosotros. L'ello ye que si peligrosu ye dir "guasapeando" mientres se conduz o falando pel móvil, agora amáganos Pokémon que pue tar na carretera, y distraer a los que lu quieren pescar. Peligru tamién pa los peatones que van "enzoquetaos" persiguiendo a esti ser diminutu ya intentando acorralalu. Polo visto hai Pokémons en cualquier requexu y poder cazalos convertióse nuna llocura d'adolescentes y d'adultos trentañeros. Dalgo cuasique imposible de pensar nestos tiempos d'abismu xeneracional.
Yá hai noticies de que se filmaron escenes íntimes mientres se persiguía a los Pokémons, qu' apaecen de sópitu en llugares onde nun son bienveníos ¡y onde naide los llamó! Digamos que son intrusos nel llugar más inesperáu. Pero ¿quién los coloca en sitios estratéxicos que cuasique nun somos a imaxinar?
Paez ser que'l xuegu pue llevanos a situaciones abondo peligroses. Los espertos asturianos compárenlu con un "Gran Hermano" encubierto. L'aplicación aprovechando la inxenuidá y la falta d'información de los xugadores, pue facilitar a los creadores del xuegu conocimientu de toles esperiencies cotidianes de los usuarios y asina apurren-yos de baldre un montón de datos sobre ellos mesmos y la so forma de vida. Datos que más p'alantre podrán utilizar nun sabemos cómo. Asina qu'al riesgu d'accidentes de tráficu, axúntase esti riesgu que nun ye menos peligrosu. La cuestión ye que tamos más controlaos de lo que pensamos. Esta vez a traviés d'un xuegu qu'engayola a pequeños y grandes.
Ocúrreseme que lo mesmo llevamos a Picachu a recostines y nun lo sabemos y dalguién va tres de nosotros apuntando col móvil pa quitanos el pesu d'encima.
Sicasí, el tema nun me paez de broma.
