La Nueva España

La Nueva España

Contenido exclusivo para suscriptores digitales

Moñeques "luk thep", sobrenaturales

Lleguen les moñeques con espíritu dientro'l cuerpu, que tienen poderes y atrayen la bona suerte

Cuando yera neña, xugaba con una moñeca de trapu, cola cabeza fecha con una pataca o una mazana, y que duraba namás unos díes. Por veces tamién tuvi dalguna moñeca de cartón, qu'en cuanto se m'ocurría da-y un bañu, deformábase y desfacíase nun tris, como si-y entrara de sópitu una gafura.Yo poníame triste porque aquelles moñeques pa mi teníen vida, escuchábenme y mimábales como si fueren neñines de carne y güesu y formaben asina parte de les mios fantasíes, que siempre fueron esaxeraes.

Cuando yá yera más grandina, llegaron al pueblu unes neñes que veníen de Venezuela, Linita y Puchi, y traxéron-y de regalu a la mio vecina Isolina una moñeca de goma, guapísima. Elles tamién traíen una moñeca caúna, una negra y otra blanca. Quiciabes foi esti el mio primer contautu con "xente" d'otru color. Encariñeme yo tamién cola moñeca de la mio vecina y pasábemos les tardes xuntes xugando con aquella preciosidá. Yo yá tenía dalgo d'arte pa crear, ya diseñé-y ya cosí-y vistíos perguapos, talo como si los cosiere la meyor modista.

Dende aquella época y a lo llargo de tola dómina de finales del sieglu XX, moñeques de lo más guapo y de lo más sofisticao fueron pasando poles manes de les neñes. La Nancy, o la Barbie, que foi y ye tan famosa como cualquier estrella de cine y pa la que diseñaron traxes y complementos les meyores modistos y firmes. ¡Cuántes ilusiones vivíes con estes y otres moñeques!

Y agora, como yá nun saben qué inventar, lleo na prensa la llegada al mercáu d'unes moñeques de lo más singular. Son les "luk thep", que tán causando furor en tierres orientales. Moñeques como les de tola vida, pero que lleven dientro un espíritu. Esto suénanos bien raro. Al paecer, l'espíritu nun vien de fábrica con elles. Hai qu'acudir a un monxe pa que-yos realice un ritual, que ye habitual en Tailandia pa bendecir amuletos. L'espíritu abellúgase darréu no cuerpín de les moñequines y conviérteles en xuguetes sobrenaturales. Los templos budistes tán desbordaos a la gueta d'espíritos pa que s'agospien nos cuerpos d'estos ánxeles de la suerte, y yá hai testimonios de los beneficios que-yos traxo la moñeca en cuestión, tanto a neños como a mayores.

.De xuru que les "luk thep" nun tardarán en llegar a los nuesos escaparates, y como los humanos somos bien parecíos en toles partes del mundu, tamién nos entrará la fiebre por estes moñeques- ánxel que nos protexerán. ¿Cómo les bautizaremos? Y a ver a quién vamos acudir nosotros pa mete-yos l'espiritu nel cuerpu. Los cures yá puen inventar dalgún ceremonial pa dir empobinando los espíritos que s'agospiarán nos cuerpos moñequiles. Tamién cabe la posibilida de que nos les manden de Tailandia con espíritu incorporáu.¡Tamos bien arreglaos! ¡Taremos sollertes!

Compartir el artículo

stats