La vida de los centros escolares desarróllase nun espaciu que podríemos considerar protexíu. Sin embargu, cada vez paez que ye más difícil la convivencia nos centros educativos. Nun podemos xeneralizar, pero cuando soceden unos cuantos casos de violencia física y psicolóxica, l'ambiente engáfase y el mieu amaga y apodérase de determinaes estayes y momentos escolares y sociales.
La escuela, amás de los conocimientos que se depriendan, ye principalmente un llugar de socialización, onde se prepara supuestamente p'andar el duru camín de la vida. Y esto namás se consigue educando en valores. Sicasí, güei nun ye solo la escuela la qu'educa. Los competidores son munchos y "eduquen" en contravalores. Les redes sociales, los videu-xuegos, la tele y tola basura que puen topar n'internet formen parte de la vida de munchos escolares. Programes violentos onde la xente se maltrata, s'insulta y grita ensin control? programes ensin conteníu que s'asemeyen a un infiernu.
Esto cala na sociedá y reproduzse, por veces, nos centros d'enseñanza. Cada poco, como si se tratase d'un gotiar continuu, infórmennos los medios de comunicación de socesos que nos conmueven. L'últimu la brutal agresión sufrida pola neña de Palma golpiada con saña por collacios mayores. Un socesu escalofriante que nos fai planteanos qué ye lo que ta pasando nesti mundu onde reina l'agresividá y la llocura.
Pídense, lóxicamente, responsabilidaes. Pero'l problema ye mui grave y hai qu'atayalu dende la fondura del mesmu. El socesu obedez como otros munchos casos a la violencia que nos amaga nesta sociedá na que reina l'egoísmu, la falta d'empatía, la falta de solidaridá y la falta de too. Una sociedá onde el que sufre dalguna diferencia ta espuesto a ser castigáu y marxináu. Na escuela, y sin pretender xeneralizar, marxínase y golpiase física y sicolóxicamente a los que destaquen por dalguna cualidá y tamién a los que tienen deficiencies. Los mandones, los líderes de grupos violentos, son los qu'arrequexen a los demás. Namás ellos tienen drechu a ocupar espacios, a tener amigos, a participar en xuegos y n'otres práutiques non tan sanes.Y someten a parte de la población escolar, onde se silencien munches práutiques abusives por mieu a denunciar, hasta que, pola mor de la crueldá y placer de maltratar, danse fechos tan brutales como'l que sufrió la neña de Palma.
Pue dicise que l' abusu y la violencia escolar nun ye dalgo d'estos tiempos. Toos conocimos bien na nuesa infancia la palabra abusón. Pero güei la violencia azótanos multiplicada por mil nes escueles ya institutos y na calle. Los porcentaxes qu'estos díes nos amuesen los medios de comunicación son preocupantes. Tomar midíes va tener que ser cosa de toos y debiera ser dalgo prioritariu pa los responsables de la seguridá na escuela.
