Hai unos díes que cumplí años y como manda la tradición apagué les veles. Bueno, pa dicir verdá una vela, porque si non llenaría la tarta de veles, y como p'atraer la bona suerte hai qu'apagales toes d'una vez, val más prender una que valga por toes y asina la suerte ta asegurada. Nesi momentu tan especial, diome por cavilar qué maxa tien l'apagar les veles de cumpleaños y cuándo fuera la primera vez que celebré'l cumpleaños cola tarta y les veles. Nun fui a alcordame. Nun ye esta una costume que tuviera puxu antaño nes aldees d'Asturies. Magar na mía casa había veles per uquier porque la lluz allumaba poco. Yera lluz d'una dinamu que se diba debilitando según avanzaba la nueche, cuando la xente entamaba a conectar aparatos de radio y planches eléctriques y quedaben namás unos filinos de lluz na bombilla. Había qu'ayudase d'un candil de carburu, llámpares d'aceite y veles. Nesti casu, les veles teníen como finalidá d'allumar la nueche, que yera mui escura. Sicasí, les veles tienen un montón d'aplicaciones máxiques rellacionaes con creencies y supersticiones.
Na mio infancia yo más bien rellacionaba'l valir de les veles colos muertos y les ánimes. Cuando moría una persona de la casa, a lo llargo d'un añu diba un familiar a misa tolos domingos a "allumar", con un candelabru con dos o tres veles, que cada familia tenía pa la ocasión. Lluz de la vela que si'l difuntu taba nel purgatoriu diba darréu camín del cielu.
La tradición d'utilizar veles con sentíu máxicu bien de mui antiguu. En cada cultura, en cada pueblu, atribúin a les veles encendíes, según la so forma, color o comportamientu, ciertes creencies averaes a temes como la mala suerte o la bona suerte, l'amor, la fortuna, el bien y el mal, inclusive a temes rellacionaos colos fenómenos naturales. Les veles bendites el día'l xueves Santo consérvense tol añu pa espantar la tronada. Unes gotines de cera na puerta casa faen fuxir rayos y centelles.
L'ello ye que les veles, dende allumar a los muertos hasta facer conxuros y maxa, tienen un aquello especial. Y ta vixente'l demostrar pidíos y agradecimientos a la Virxe y a los santos más milagreros prendiendo unes veles na ilesia nel so honor. Vela pal bautizu, veles nes bodes y veles que lleva la güestia cuando nos asusta caleyando pelos caminos.
Veles decoratives, con distintos colores y arumes, que dexen la casa perfumada y protexida de mala sombra. La llama, la llume de la vela, tien tol poder y la maxa que-y queramos dar. Ello porque'l fueu tien en sí una bona dosis de maxa y de misteriu.
Agora que s'acerca la Navidá, en poques meses faltarán unes veles guapes pa decorar y pa perfumar l'ambiente. La so llama ye símbolu de la lluz que deseamos qu'allume la Navidá y qu'allume tol añu la nuesa casa.
Los meyores deseos de lluz pa esta Navidá y pal 2017, que bona falta nos ha facer. Hai muncha escuridá nel mundu, por más que la illuminación artificial nos enllene de brillos y resplandores.
