La muerte llega y nun hai quien la torne. Llévanos ya iguálanos a toos. Lleva a los grandes, a los que dexen resclavu brillante del so pasu pola vida y a los que pasamos más en silenciu. Nun repara la muerte y ta siempre sollerte y sorpréndinos en cualesquier llugar.
Y esta vez la muerte llevó a Gil Parrondo, ún de los grandes nel mundu del cine, valdesanu de nacencia. Tamos de llutu n'Asturies. Tamos de llutu en Valdés, na villa de L.luarca, onde nació. L.luarca, llugar qu'él escoyó pa descansar, nesi cementeriu que mira a la mar, onde tolos díes lu acariñará, a xeitín, la brisa. Tán de llutu en L.landelabarca, una braña de Trevías onde de xuru deprendió'l valor de trabayar día y nueche, como se facía naquel entós nes aldees y brañes asturianes.
Él escoyó'l camín del arte, enllenu d'ésitos y reconocimientos como se merecía, de xuru qu'amparáu polos valores que deprendió de neñu nestos llugares y que llevaba apegaos al corazón.
Gil Parrondo destacó pola so trayeutoria como direutor artísticu y destacó pola so amabilidá, humildá y cenciellez, amás d'otres munches cualidaes. Quien ye grande ye muncho más grande si ye humilde. Hai unos años que tuvi la suerte de tar na so casa en Madrí, onde me recibió col cariñu y simpatía que lu carauterizaba. Y mostróme con arguyu toos aquellos galardones qu'adornaben los estantes de la so casa, atacaos de reconocimientos. Tuviemos una charla llarga y animada. Dos "Oscar" al meyor diseñu de producción y cuatro "Goya" a la meyor direición artística, amás de les medalles mas prestixoses y otros munchos reconocimientos, son como pa poder presumir, pero la humildá taba siempre presente nel so ser. Él, amás del so destacáu y premiáu trabayu nel mundu del cine, que lu llevó hasta Hollywood, tenía un feixe d'esperiencies vitales, d'anéudotes, de recuerdos y d'histories que contar. Éstes son les que se van con él pal campusantu. Gil Parrondo, amás de tolos ésitos nel so mundu artísticu, yera un llibru abiertu del que cola so muerte s'acaben d'arrincar delles páxines. Cola so partida piérdese parte de lo más íntimu y humanu. Aquello tan guapo que toos llevamos con nós a la tumba. Sicasí, amás de los galardones y reconocimientos, él déxanos una herencia estraordinaria que ye la forma de trabayar con procuru y con esfuerzu y desarrollando al máximu les cualidaes que la vida-y regaló al nacer.
Hai que ser posesor de la escelencia pa trunfar nel mundu del arte, un mundu competitivu si los hai. Hai que ser un xeniu y amás tener otres cualidaes y entregate dafechu en tolo que desarrolles. Gil Parrondo nació con estrella. La estrella que lu illuminó siempre. Quiciabes nació nuna nueche estrellada, como les que tantes veces contemplaría de neñu en L.landelabarca y que se puen contemplar inda güei, ellí onde nun llegó la contaminación lluminosa.
Dende'l pasáu día 24, Gil Parrondo será una más de les estrelles brillantes que contemplamos nesi firmamentu infinitu.
Él foi estrella en vida y será estrella na dimensión qu'hai unos díes-y dio posada pa siempre. Descanse en Paz.
Dende estes llínies, el mio más sentíu pésame a la so familia.
