La Nueva España

La Nueva España

Contenido exclusivo para suscriptores digitales

La ventana de Dalí

Al traviés d'una ventana podemos ver toles guapures y gafures del mundu

Hay un cuadro de Dalí que siempre me gustó muncho. "Muchacha en la ventana".Tengo nel salón enmarcada una llámina que reprduz d'esti cuadru, y por veces quédome mirándolo ensimismada, inda nun sei bien por qué. El cuadru ye guapísimu. Una moza d'espaldes, asomada a una ventana. Si fuera l'auténticu, que se guarda nel Muséu Reina Sofia, miraríalu inda con más ciñu. Dalgo inalcanzable. Nun fai falta esplicalu.

Nuna ocasión, vieno a casa una persona y llamó-y l'atención el cuadru, quedóse mirándolu y entrugóme si la que miraba pela ventana yera yo. Yo sonrime y contesté-y que sí, y espliqué-y que en realidá yera la hermana de Dalí, pero que yo miraba por veces por esa ventana, que maxinaba abierta al mundu.

Quiciabes el cuadru de Dalí me gusta tanto porque la ventana, en sí, tien pa mí un significáu máxicu. Y precisamente dende esa ventana abierta que pintó Dalí pue una imaxinase un mundu diferente.

Na casa onde nací, asomábame a la ventana del mio cuartu y vía un monte enllenu d'arboles, que cada estación cambiaben de color, sentía'l burbús del ríu'l Zurdo y contemplaba'l Picu de Capiel.lamartín, maxestuosu y altu. Un picu que nos amuesa un rostru de muyer, pintáu pola erosión del tiempu nes llastres de la lladera. Tolos díes miraba dende la ventana aquella cara rara, que namás tien un güeyu y que, por veces, paecíame vela de perfil y otres veces paecía que me miraba de frente. Una cara rara que tantes veces me fizo maxinar una monstrua, o una patarica, porque, pensaba yo, si hai monstruos tien qu'haber monstruas; si hai pataricos, tien qu'haber pataricas.

Sí, porque'l pataricu, esi ser caníbal que tien namás un güeyu, taba presente nel imaxinariu de la mio infancia y munches veces formaba parte de los mios suaños medranosos.

Agora que'l cuentu de los pataricos, que me cuntaba mio güela con tanta tenrura pasó a la mio historia de vida, y yá nun me produz mieu, miro pela ventana que pintó Dali y veo paisaxes, ríos, ruíos, prieses, coches, gritos?Veo'l cielu y la nublina, veo lluces y solombres. Ta visto que dende la ventana del maxín vemos lo guapo y lo feo de la vida.

Compartir el artículo

stats