Pa cuentos de gaita, el de la pasarela del puertu de Llanes, que costó 400.000 euros (en pesetes, un paxáu) y que se muerre d'aburrición nuna gasolinera (nun ye broma). L'asuntu ye qu'al Gobiernín d'esti país chiquitayu, un día que mataba mosques col ráu, puénxose-y na nariz engarametar un pasu peatonal penriba'l puertu. Pero non onde siempre lu hebo, sinón ente l'edificiu l'antigua rula y la Casa la Mar. Esto ye: na metá, de la metá, de la metá del puertu, nuna zona que-y dicen "bien d'interés" o daqué asemeyao dende'l tiempu maricastaña. Y anque hebo a lo primero dos informes negativos, daquién sacó del refaxu un terceru positivu, y la ocurrencia tiró p'alantre (¡cagontal, sedrá por perres!). En eses, a los llaniscos dio-yos por camudar el votu y dieron-y l'Alcaldía a los que nun queríen la dichosa pasarela. Paez qu'al final van ponela en puertu, pero igual esti cuentu tovía nun acabó.