Dicíamos ayeri que nun había programes eleutorales n'asturianu ente los cinco "grandes", PP, PSOE, Podemos, Ciudadanos e IU. Yá hai unu. La formación de Pablo Iglesias acaba de colgar na web el so programa eleutoral en llingua asturiana. Ye quiciabes un pequeñu pasu pa Podemos, pero un gran pasu pa los asturfalantes. El de Podemos ye l'únicu programa que tien un apartáu pa caúna de les comunidaes autónomes del Estáu. Tocante a Asturies, fala de Fondos mineros, d'un plan d'infraestructures y del ferrocarril de la Vía de la Plata. Nun se refier a la oficialidá de la llingua asturiana, pero sí a la Carta Europea de les Llingües Minoritaries, que l'aconseya y la defende. Ente los demás partíos, namás el PSOE e IU citen de pasada delles comunidaes, pero s'escaecen d'Asturies. Y todos falen de "llingües cooficiales", pero nin un res del llimbu nel que, como ánima en pena, ta atrapada la llingua d'Asturies, patria querida.
