La Nueva España

La Nueva España

Contenido exclusivo para suscriptores digitales

Dos escritoras llaniscas

Sobre María Luisa Castellanos y Rogelia Martínez, autoras locales

Ello e que María Luisa Castellanos y Rogelia Martínez joren dos muyeres de Llanes que mos dexaren llibros, artículos y daqué versu al respetive del nuestru conceyu y otros asuntos, una usó n'ellos el castellanu y otra quiso más el modu parllar de la tierra.

María Luisa Castellanos González (El Cuetu (Llanes), 1892-Méjico, 1974) joi una escritora costumbrista y romántica tardía que gustó de temas políticos, relixosos, sociales, morales, jezo novelas... La so madre, Pilar González González, era del pueblu llaniscu de Parres y el so padre, Luis Castellanos, escritor y procurador, de Madriz.

Más que nada aniantes de la guerra, la pluma de María Luisa jalló ñeru en muchos pedióricos y revistas d'Uropa y América; dellos títulos onde apaeció son El Pueblo (de Llanes, dirixíu pol so padre ente 1908 y 1918), Alma Astur (pedióricu que cofundó), Asturias, El Comercio (de L'Habana los dos), El Eco de los Valles (de Panes), La Esfera, Heraldo de Madrid, La Voz, El Carbayón, La Voz de Asturias, Album de San Mateo, Hojas Selectas, Actualidades, La Alhambra, El Liberal, Galicia Pintoresca, Trabajo, Torrelavega Gráfica, Heraldo Montañés, El Cantábrico, El Correo Español, Nuevo Mundo, Mundo Gráfico, Rojo y Gualda, Castillos y Leones, El Universal, Universal Gráfico, La Raza, El Día Español, Hispania, La Voz de Avilés, El Día Español, Revista Asturias...

Casada en 1921 con Antonio Alonso Inguanzo, pocu dempués embarca pa Méjico, onde trabayó de maestra y, como Luis Castellanos, de procuradora de los Tribunales.

En 1963 sacó en Méjico un llibru costumbrista, "Baluarte de gracia: Llanes", onde salen cómo entamaren los bandos de la Villa o cómo eran el pericote o dellos traxes de las funciones, amás d'otras muchas razones del conceyu onde era nacía.

Rogelia Martínez Fernández (Porrúa, 1942 - Santander, 2004) e l'autora de "Porruanos. So jabla y sos costumbres", unu de los llibros más güenos de los jechos en conceyu Llanes; editólu en 1997 en Lamadrid, aldea del municipiu cántabru de Valdáliga onde vivía y e el primer llibru en prosa escritu lo más d'elli nel asturianu d'esti sen.

Como el so títulu diz, e"Porruanos..." apaecen, con munchas semeyas de tou ello, la cultura y tradiciones de Porrúa, los hombres y muyeres del pueblu, los críos, los vieyos, la mocedá, los rapazos, los indianos, los pastores, los teyeros, las pallabras de la tierra, costumbres como magüestos, bodas, prucesiones, el traxe, los llabores del campu, el matacíu, los bolos, las jornas, los llagares, los cantares, las juentes, las funciones, los nombres de los barrios, las mayadas y las vegas. Y a lo últimu, un pallabreru con miles de nombres de "la jabla de Porrúa".

E una obra d'hestoria y de la xente, de lo que joi un pueblu, de lo qu'era y de lo qu'e, y como tovía queda muchu por escribir en tou el conceyu Llanes, tamién e un güen espeyu pa otros pueblos.

Compartir el artículo

stats