La dimisión en bloque de la direutiva de l'Asociación de Madres y Padres del Colexu Públicu de L'Infiestu ye un claru exemplu de que nun solo la política ta alloñada de la xente. O de que too ye política y que la política arrampla con too, que sedría tovía peor. El coleutivu vase por discrepancies cola direición del centru educativu, que, según los proxenitores, nun fixo casu de les sos reivindicaciones, ente les que tan que los alumnos d'Infantil trabayen sin llibros y que la escuela s'adaute y s'avece a métodos modernos, de los tiempos que cuerren. Anque les lleis falen de participación, la realidá ye que nos centros educativos manden los políticos, que como manexen les perres acaben creyendo que son de so. Y'l profesoráu vese obligáu munches vegaes a baillar al son que toca la Conseyería y la so "troupe". Lo ideal, nuna democracia abierta y participativa, sedría que los centros educativos se gobernaran dende abaxo. Hai que dar esi pasu.
