Tolos díes, llueva o heba sol, con fríu o calor, avancen ocenes de pelegrinos pel Camín de Santiago, al so pasu pel Oriente. Ye verdá qu'hai munchos más caminantes nel branu, pero tamén que nun falten na primavera, n'iviernu y nel tardíu, polo que la ruta xacobea ye tol añu un atractivu turísticu de primer orde, al que les autoridaes polítiques que nos echamos al llombu colos votos nun acaben de dedica-y los esfuercios que merez. Porque bien cudiáu y atendidu, el camín a Compostela podría entá xenerar munchos más beneficios na comarca. Pero, una vegada más, tien que ser un particular, Fernando Granda, collaborador de LA NUEVA ESPAÑA, el que-y dé llustre a la ruta santiaguina, nesti casu nel pueblu de Barru, con indicadores de calidá. Y entrúgase ún: si un solu paisanu ye capaz de facelo, ¿cómo ye posible que l'Alministración, con tolos recursos de los que dispón, nun lo seya? ¿Sedrá incompetencia o desdexamientu?
