El 7 de marzu de 1868 Sabel II reinaba n'España, el presidente del Conseyu de Menistros era el xeneral Ramón María Narváez, duque de Valencia, y faltaban seis meses pa la Revolución de 1868; esi día nació en Tárañu, un pueblu del conceyu Cangues, Esperanza Nieda Redondo, jiya d'Alfonso Nieda y de Manuela Redondo, nacimientu rexistráu nel llibru primeru foliu 41 de la parroquia de Llenín.
Esto e qu'el 7 de jebreru de 1969, cuando quedaban cinco meses pa qu'el hombre pisara la Lluna, salió en LA NUEVA ESPAÑA (páxina 13) una entrevista a Esperanza jecha pol corresponsal Luis Prada Vicente (que tamién allegó a ser alcalde del municipiu), titulada "Esperanza Nieda, una pastora centenaria", y con ella quedaren nel papel las alcordanzas d'esta muyer, que tevo doce jiyos (un bisnietu apaez nuna semeya de la entrevista) y joi pastora unos ochenta años nel Puertu Cangues, el que ta al merudía de los pueblos del conceyu y tien dientro muchas vegas y picos, los Llagos d'Enol y Peña Santa. La entrevista dizmos cómo era la vida antiguamente pa mucha xente d'Asturias (o Asturies, como se dicía antiguamente a la oriella el Sella).
Esperanza pasaba los más de los meses del añu en Puertu, en Vega Redonda o La Rondiella pero, cuando nevaba arriba, baxaba a Güesera. Primeru curiaba ganáu d'otros pero siempre tevo cabras d'ella ("cuando la guerra lleváronmi les cabres, les vaques eren a comuña, pero les cabres eren míes"). No sabía lleer ni escrebir, los sos padres no pudieren echala a la escuela porque tenían otros siete jiyos y tos ellos tenían que trabayar ya de críos.
Lo que más-y gustaba jacer, cuntó al pediorista, era "jilar, oh, lo que tengo yo jiláu en Vega Redonda, había día que jilaba un cadexu, jilaba muchu desde que empecé a dir al puertu a cuidar el ganáu a los diez años, jacía sábanos y calcetos sin parar, ¡cuántu jilé yo en mi vida!, y todavía jilo algo pero no muchu, porque no veo bien". "Nunca fui al Enol el día de la fiesta. Y eso que me animaban a presentarse al concurso de jilados. Pero no me atrevía, porque había muchu barullu".
Y muchas más cosas dixo na entrevista.
