La estrencha rellación ente la reivindicación de la llingua asturiana y la de los drechos de la muyer ta fuera de toda dulda, como podemos ver nestes feches próximes al 8-M: demuéstrenlo proxectos como "Nun tamos toes", un grupu de pandereteres que va cantar coples feministes demientres la manifestación de Xixón.
Arriendes d'ello, les escolines d'asturianu nes escueles ya institutos d'Asturies yá tán tamién empecipiando la so reivindicación. Asina podemos velo nos cartelos y cartulines qu'escolinguen de les parees de munchos institutos, como'l doctor Fleming d'Uviéu.
Nesti IES, que recueye a munchu alumnáu de Riosa, Morcín o Güeño, pon escuela Carmela Fernández García, que rellata a "Escolinos" les xeres nes que trabayen los sos escolinos: "creemos nel valir de la muyer en tolos ámbitos, y trabayamos nel feminismu dende el día a día de la clas". Según cuenta Carmela, la conciencia llingüística y la reivindicación de xéneru nun son coses xebraes, sinón qu'apaecen xuntes y entemecíes a lo llargo de la clas. Amás de les charres y la creación de cartelos sobre'l tema, Carmela convida a les neñes y neños a que fagan semeyes a los cartelos feministes que vean pela cai.
