L'arzobispu d'Ovieo insulta a la xente. Por favor, nun s'entienda como una crítica: ye una constatación. Yo nun veo por qué un clérigu nun va poder insultar como cualquier otru ciudadanu. A fin de cuentes, l'insultu nun ye más qu'una forma esaltada de la llibertá d'espresión y cuando merez condena ye por entemecer llevantos o por encontiase nun lésicu desagradable. Ninguna d'estes dos taches se-yos pueden poner a les palabres que pronunció l'arzobispu nel pregón col que la Junta de Hermandades y Cofradías inauguró la polémica Selmana Santa carbayona.
Por desinteresase de les persecuciones que sufren los cristianos en Libia, Sanz Montes puñó contra los políticos y contra "los llamados intelectuales artistas" (si ye por él, súbese tovía más l'IVA cultural, pamidea). Hasta equí, el mitráu despreció pero nun faltó a naide. L'insultu dedicólu a una tercer clase de persones ensin poder constabable nin predicamentu a títulu personal pero testeronamente reivindicatives. "Pancarteros perroflautas", fue'l dicteriu. "Perroflauta" ye términu peyorativu que define al usuariu tanto o más qu'al referenciáu. Siéntese namás en boca de dellos sectores sociales y en dellos medios de comunicación. Quiero decir qu'un "perroflauta" enxamás va referise a él mesmu como "perroflauta", característica esencial de los insultos. Eso sí: les coses, col tiempu, cambien. Piénsese que ya esisten, nel calendariu festivu laicu, los díes del orgullu gay y del orgullu friqui, ¡quién lo diba decir hai unos cuántos años! Nun podemos escartar l'establecimientu futuru del día del orgullu perroflauta. Coincidiendo col Vienres Santu, por exemplu.
"Perroflautas" y "pancarteros", pa más inri (sigla mui amañosa estos díes). Pancarta ye a pancarteru como palma a palmeru. Supongo que l'arzobispu bendecirá a los palmeros que se manifiesten peles calles de la sede episcopal el Domingu de Ramos, manifestación gozosa qu'airea una primavera prístina col sescudir de les palmes. Ye l'alegría que da la verticalidá. Tolo que se llevanta p'hacia'l cielu (o pa escontra'l Cielu) anima. Tamién les pancartes, que son palmes alfabetizaes, como les palmes son pancartes analfabetes. Nos dos casos celébrase a un mesías: les palmes a ún que se cuenta llegáu y les pancartes a otru que se reclama. Les manifestaciones derivaes del 15M fueron y son prolífiques en pancartes, proclames y consignes; les de la Ilesia, en xeneral, figuratives, estatuaries. Represéntasenos una confrontación ente la palabra y el silenciu, tan digna la una como l'otru. L'arzobispu denigró la primera a costa de sacrificar el segundu.
stylename="070_TXT_opi-correo_01">miliorodriguezcueto@wordpress.com
