La Nueva España

La Nueva España

Contenido exclusivo para suscriptores digitales

miliorodriguezcueto.wordpress.com

Machu alfa

El espectáculu de declaraciones impagables de Agustín de Luis

Machu alfa

Si ye usté prensófagu/a, tará al tantu de la incarcelable autoestima d'Agustín de Luis, el que fuere años atrás xefe de la Policía Local d'Ovieo y dende hai un par de díes inquilín de Villabona, que, n'entrevista concedida a La Nueva España'l pasáu miércoles na so residencia de Salinas, comparábase, como víctima de la inxusticia, col Cid Campeador y con Xovellanos. Nun soi quien a imaxinar qué parangón podía alcontrar pa la so felicidá nos tiempos lluminosos del uniforme omnipotente, pero camiento que, por contraste, debía tresformar a los querubines del segundu coru celestial en barbudos prietos, sospechosos d'aeropuertu. Y val más nun se plantear qué maravilles admirará nel espeyu, anque dalguna pista sí dio cuando, na citada entrevista, pronosticaba poner la cárcel pates arriba cola so presencia gallaspera porque, "como estoy tan bueno, alguno intente?" Cuando, el xueves, salió del pisu de Salinas pal coche policial que lu diba llevar pal cuartón, un grupu d'incondicionales aclamólu "¡Torero, torero!" Él saludó al tendíu. Mal cartel pa la fiesta nacional, tan sescudida últimamente. Yo, si fuere taurinu, protestaba.

De les munches perles de machu alfa que soltó pal periodista, Pablo González, quédome cola que pon a Cristo al so serviciu, de númberu subalternu: "Jesucristo está a punto de descolgarse del madero y tirarse a la yugular de alguien ante tanta injusticia." Magnífico. Poques veces tien ún ocasión de lleer una babayada ("sobrada", dicen agora los chavales) tan gorda. El corderu mansu, l'heraldu del perdón, el profeta de la fraternidá tresfórmase en vampiru sanguinariu y pasa, amenazadoramente calmosu, la llingua carmesí pelos llabios pa limpiar l'últimu cuayarón de sangre enemigo, porque los enemigos d'Agustín de Luis son los enemigos de Dios. Personaxes d'esta castra paecen más obra de pluma picaresca que d'óvulu naturalmente fecundáu. Albidramos, con deséu voluptuosu, un relatu autobiográficu cucháu d'aventures quixotesques na forma y lazariegues nel fondu.

Na entrevista publicada'l xueves, De Luis declarábase consagráu al estudiu del inglés: "Todo el mundo me ve por Salinas paseando con la revista de Vaughan", ponse él, fachendosu. Bueno, hom: pa empezar ta bien, pero tampoco ye "Finnegans Wake". El xueves, el so abogáu dixo que lu dexó en Villabona con un llibru de Kant nes manes. Pamidea, ehí hai interferencies ortográfiques: nun s'escribe "Yes, we Kant", don Agustín. Algún malintencionáu, viendo tanta esibición de lectura a vueltes, sacará a cuentu aquello de "dime de qué presumes y te diré?" Nun-y faiga casu: mánde-y usté a Cristo pa que lu esangre. Esa ambición de lustre llibrescu ye digna d'aplausu, particularmente nestos tiempos d'analfabetismu galopante. Yo anímolu, don Agustín, a ponese al día tamién notros conocimientos. Hai historiografía postfranquista sobre'l so compañeru de calvariu, Rodrigo Díaz de Vivar: consúltela. Píntalu al frente d'una banda de mercenarios qu'arrendaben la espada a moros como a cristianos, siempre al serviciu de la bolsa personal. Y busque les opiniones de Xovellanos sobre la tauromaquia. Si-y lleguen a gritar "¡Torero, torero!" cuando lu desterraron pa Bellver, seguro que lo tomaba como un insultu. Aproveche la condena y llea, llea: algo seguro que-y aprovecha.

Compartir el artículo

stats