"La isla'l tesoru", capítulu 21. Jim Hawkins y los caballeros que lu acompañen na so aventura, guardaos del asediu piratanun fortín, reciben una primer andanada que-yos anuncia l'ataque inminente: diecisiete disparos. Asáltenlos diecisiete filibusteros. Usté ya sabe cómo acaba la novela: los pirates pierden porque pa eso son los malos. Nunca tuvieron ninguna oportunidá. El so tiempu ya pasare aquel añu de gracia de mil setencientos y tantos. Les grandes fazañes del capitán Flint, al que tienen siempre na boca, admiraos y reverentes, y que paez enveredalos tovía dende l'otru mundu, son ya cuentos vieyos, épica inane pa usu internu del clan llagañosu y coxicón. Jim nun los respeta porque los ve enfermos, mutilaos, viciaos, decadentes. Con ellos descubrió la mar pero tamién la traición, y esi segundu descubrimientu, posterior, trescendente, va facelu un home.
Los diecisiete conxuraos dimisionarios de la Executiva Federal del PSOE, pueser que como mecanismu compensatoriu a la evidente meridionalidá del proyectu, pensaben en Javier Fernández pa dirixir una xestora interina, según cuenten los papeles. Un periódicu dixital ultramontanu (vistudende onde tamos usté y yo), enumberando les virtúes que lu cualifiquen pal cargu, referíase a él como referente intelectual y moral. Desconozo qué base tienen axetivos talos, pero, a fin de cuentes, yo soi un gran ignorante. Asina que restolé pel catálogu de la Biblioteca Nacional d'España buscando una relación d'obres del presidente del Gobiernu astur, anque fueren namás d'Inxeniería, que me lu acreditaren como pensador. Nun apaeció ninguna. Bibliografía, cero. Paréme, entós, a considerar los sos méritos morales. Ciertamente, nun hai noticies dickensianes de Javier Fernández: naide lu vería nunca maltratando güérfanes o estafando güelinos, nin siquiera güelinos de families empresaries millonaries. Pero eso ye como nun dicir nada, paezme a mi, porque la moral política pertenez a una subcategoría vinculada estrictamente al desempeñu de responsabilidaes na cosa pública. Por poner un casu, nun abulta moral qu'un gobernante que nun ye quien a sacar alantre presupuestos anuales s'engarranche al sillón en perxuiciu de los ciudadanos. Esta mesma selmana, otru presidente autonómicu, Carles Puigdemont, punxo'l cargu enriba la mesa si'l parlamentu catalán nun-y aprobaba los presupuestos del añu qu'entra. Un actu políticamente moral, nes antípodes del asturianu. Y, a too esto, Puigdemont sí tien obres nes baldes de la Biblioteca Nacional: dos a cero.
Si de verdá yera Javier Fernández la persona escoyida polos diecisiete de la isla'l tesoru? digo de la Executiva Federal, pa confia-y los trámites d'un procesu sustitutoriu, otra virtú distinta de les anteriores será la que-y ven (porque tampoco paez que la moral o l'intelectu pesen muncho nel PSOE nos últimos tiempos). Será la fidelidá, que nun va, necesariamente, de la mano de la intelixencia (nin siquiera del raciociniu); será, y perdóneme'l palabru, la "inofensividá" del que, anque namás seya por razón d'años, nun hai mieu qu'aproveche la coyuntura p'atrincherase nel poder (yo, nesto, nun ponía la mano en fueu?); será porque ye un desconocíu fuera d'Asturies, incomparablemente menos referenciáu nos medios que presidentes tan importantes nel Estáu como'l d'Extremadura o Castilla-La Mancha; será porque nun hai muncho onde escoyer? Pero nin eso, sin siquiera será: sería.
miliorodriguezcueto.wordpress.com
Cola ayuda de la Conseyería d'Educación y Cultura del Principáu d'Asturies
