Por engañar la vida, tan probe n'argumentos (reprodución y muerte) y con tantu tiempu en mediu pa folgar y pensar maldaes, inventáronse los ciclos: romeríes de prau, baños de setiembre, cumpleaños, mises dominicales o'l cantar decepcionante de los neños de San Ildefonso. Hai algo nos ciclos, nes repeticiones, irresistible, y non solo pa les persones: cualquiera que conviva con un perru puede entendeme.
Otru añu vuelve'l ciclu anual de los Premios Princ(ip)esa de Asturias, repítese nel Campoamor la elegante pasarela que quier hermanar cultura, aristrocracia, burguesía espurrida y clase política puesta de punteres y, enfrente, a una distancia tutelada policialmente, repítese tamién na Escandalera, con munches menos gales, la protesta republicana, denunciante y prorredistributiva. La segunda nació por sobresposición de la primera, por nun decir por sobredosis. Resultaba inevitable. La población carbayona espera ya pola segunda cola mesma naturalidá resignada que pola primera. Ensin falta de que pasen munches convocatories más, les dos van poder compartir l'axetivu "tradicional" nos medios de comunicación ("A su tradicional llegada al teatro Campoamor, sus Majestades saludaron a los congregados en la tradicional pitada de la Escandalera"). El sistema autofagocítase, tiende a tragar, dixerir y integrar cualquier escrecencia que produz, y nun tenemos que nos estrañar si, d'equí a unes décades, el Premiu a la Concordia recái nel colectivu Marchas por la Dignidad, que tantos xiblatos aporta al eventu.
Reduciendo los fechos al nivel más elemental posible, los republicanos y otros descontentos congréguense a xiflar cerca'l Campoamor porque, pela so puerta (la del teatru y tamién la d'ellos, que la casa de cualquiera tien una ventana electrónica per delantre de la que desfila'l mundu enteru), pasen y visibilícense fortunes y gobernantes que los escandalicen; y eses fortunes y gobernantes desfilen, enchipaos, porque, pela mesma puerta y per delantre les mesmes ventanes de plasma o tubu catódicu, pasa y visibilízase la Familia Real con boatu convocante y "ostentoreu", si me permite usté l'impagable axetivu bastardu. La conclusión ye clara: la que concita la protesta ye, en realidá, más que la monarquía, la visibilización de la monarquía. Un rei que nun se fixere notar, desapaecíu de los televisores, de les monedes, de les semeyes de la prensa, de La Zarzuela, de Marivent y de l'alfombra azul del Campoamor, ¿qué animadversión podía concitar ente'l pueblu insatisfechu? Un rei indistinguible ente la multitú que, a los xineros, tosa agarráu a la barra del autobús col pescuezu envueltu nuna bufanda decorada con bolines pol roce d'una barba atrasiada; que, a los agostos, compre pa la familia cortes de vainilla y nata nos puestos de xelaos de los paseos playeros calzando chancles de dea xaponesa; que, a les mañanes, llagañosu y encabronáu, gaste la batería del coche pitando pa despertar al primeru del semáforu ya en verde; que, a los escureceres, refierva delantre la tele, con un platín de croquetes enriba les rodiyes, oyendo a Eduardo Inda pegar voces en La 6; un rei que, cada mes d'ochobre, acuda a la Escandalera a grita-yos a los fachendosos que desfilen pela pasarela urbana del Campoamor? ¿quién lu diba refugar?
-Aguántame'l megáfonu, camarada Rei.
Pero, lo otro? lo "ostentóreo", usté ya m'entiende? a mediu o llargu plazu, acaba dando disgustos. Hai n'Europa bien d'episodios históricos que lo confirmen, por nun acudir a la clásica sabiduría oriental, que predica, pa los poderosos, ocultación discreta de la riqueza. Di tu que tamién dixo Confuncio aquello de que "el virtuosu calla". Pues amén.
