La Nueva España

La Nueva España

Contenido exclusivo para suscriptores digitales

Esti Güevu Sal Quier

Otra de gochos

Más sobre l'abondanza porcina silvestre

Otra de gochos

Buscando un antecedente periodísticu que me xustifique, viénome a la cabeza Eugenio d'Ors, que, allá pela década de los 40, consagró, nel diariu Arriba, una mano d'artículos a falar de llobos. Yo, como me falta la nobleza blasonada de la burguesía barceloní y, con muncha diferencia, l'altura intelectual de d'Ors, y como, pola mio condición atlántica, veo'l barru más como hábitat afayadizu que como molestia, fozo a ras de suelu y toi especializándome en gochos: seguro que ya se dio cuenta'l paciente espectador d'esta ventana.

Dicen los cazadores asturianos que los xabariles escápen-yos pa les ciudaes y que peles mates queden cuatro tosquinos, los yanomami de la especie. Pues deben facer tertulia toos nuna tierra que tengo yo pa la parte de Llaviana porque, cada vez que voi, aquello paezse más a la batalla del Somme. LA NUEVA ESPAÑA dio esta selmana pasada noticia de que les sociedaes de cazadores píden-y al Gobiernu que los dexe restolar peles zones de seguridá, que ye como decir pela rodiada d'Oviéu. Esto nun ye una decisión que se pueda garrar a lo xole, menos tovía agora que'l consistoriu carbayón va proceder a eliminar los últimos símbolos nominales del franquismu. Quiero decir que más d'ún puede ponese nerviosu si siente tiros pal Naranco al tiempo que ve cómo-y pasen una radial al escudu de la ciudá percima l'axetivu "invicta". Cuidadín.

Mientres y non, un sucesu luctuosu mereció l'atención de los medios el xueves: la guardería del Principáu mató a tres vecinos gochos de La Fresneda. "Se trata de una madre, popularmente conocida como "Ferinchi" tras sus primeras apariciones, y dos crías", reportó'l corresponsal. Esto diome qué pensar. Habrá espíritus sensibles qu'alcuentren cruel l'esterminiu d'una familia entera. Yo veo un agravante: el fechu de que la madre tuviere bautizada. Los porcinos, tradicionalmente, son anónimos: los seres humanos nun lleguemos al puntu de comer carne con nome propiu: vocales y consonantes empapicen más que la freba. Ferinchi (¡qué misterios etimolóxicos escuende l'apelativu!) nun yera un animal más, indistinguible: el sustantivu propiu reconocía-y una personalidá, una presencia reconocible, un tratu. "Mataron a Ferinchi" nun ye lo mesmo que "Mataron una gocha".

Los fíos de Ferinchi, ¿qué padre tendríen? ¿Sería ún de los vietnamites asilvestraos que'l Ministeriu d'Agricultura quier incluir na categoría d'especies esótiques invasores? Improbable: "Los vietnamitas son pequeñitos", cantaba Carlos Puebla: poca cosa pa una estricta xabarila europea de pezuña alta.

-Ya, ¿y cómo seguía'l cantar?: "Pero con unos corazones / así gigantes, así."

Ye verdá. Pues igual esos xabatos sí yeren mistos, globales: "gochinchinos".

miliorodriguezcueto.wordpress.com

Cola ayuda de la Conseyería d'Educación y Cultura del Principáu d'Asturies

Compartir el artículo

stats