L'amor y el so sucedaneu en polvu, el sexu, protagonizaron el debate d'orientación política del Parlamentu asturianu. Fernández (Javier) presentóse como un home desengañáu: nun espera amor, confórmase cola cópula interesada. Por eso, cortexó d'una manera bruta, pedropicapedraica. Buscó pareya a cantazos. Tiró-yosla a los de Podemos con un discursu pol estilu de "Mira, moza: yes un pingu y gocha como pa espantar les mosques, pero voi tapar les narices y llevate al Carmín de La Pola." Asina, les posibilidaes de trunfar son poques, campeón. Pero camentamos que'l nuestru galán ya contaba cola condena al celibatu y salió a la pista de baile mui gallu pa que nun lu tomaremos por capón.
Na pista, yeren toes fees pal so gustu. Tampoco vestíen faralaes, qu'eso da puntos. De toles maneres, una tiróse-y enriba (Fernández, Mercedes) pero él desprecióla: ye de bocáu delicáu. La entrega política de la cabezalera del PP, por siguir cola metáfora erótica, sería traducible a "¡Tomame, fai comigo lo que quieras!" O, por ser más liricos, becquerianos: "Mi frente es pálida, mis trenzas de oro / puedo brindarte dichas sin fin. / Yo de ternura guardo un tesoro. / ¿A mí me llamas?" "No, no es a ti", remató él la rima.
Decía Camilo José Cela qu'un caballeru nunca-y niega un polvu a una dama (usté siga traduciendo les metáfores a la política). Si aceptamos l'autoridá del Nobel, Fernández (Javier) resbarió. Refugada, nun sabemos si despechada, la pretendiente avisólu: "Esos no le quieren" (leísmu flagrante). "Tampoco yo los quiero a ellos. Es un matrimonio de conveniencias", retrucó-y él. Vese que ye un rapaz formal: nada d'amontonase, los papeles per delantre y en regla. Pero, la conveniencia, ¿pa quién?
Percima la bancada estrencha, musliapretada de los que nun lu quieren, flota'l serventesiu que remata'l poema: "Yo soy un sueño, un imposible / vano fantasma de niebla y luz. / Soy incorpórea, soy intangible, / no puedo amarte." A Javier Fernández tuércese-y la boca pa completar el versu: "¡Oh, ven, ven tú!"
Cristina Coto amestó un apunte estrictamente fisiolóxicu a esta encesa sesión parlamentaria: "El gran problema demográfico es su incapacidad para que Asturias crezca." ¿Ponía la forista en cuestión la virilidá, la potencia reproductora de Fernández (Javier)? ¿Puede ser que quinxere dar a entender que les repunancies del presidente asturianu a la hora d'empareyase nun seyan otra cosa qu'una cortina pa tapar un secretu vergonzante? ¿Ta imposibilitáu el presidente asturianu pa perdese ente'l maizal acompañáu d'otres sigles? Si esi ye'l casu, la FSA va tener que se plantear el relevu. L'onanismu, nel parlamentu asturianu y, particularmente, ente la izquierda, paez cosa del pasáu. Hai que crecer: busquen a alguién con canes.
miliorodriguezcueto.wordpress.com
