Les responsables (el femenín universal, pal casu concretu que nos ocupa, ye frutu de la esperiencia d'esti humilde plumíferu) del serviciu telefónicu d'una entidá bancaria mui vinculada (históricamente) a Asturies, d'un tiempu p'acá, tutéente con soltura y descaru, digo yo que porque-y lo aconseyaría a la empresa algún asesor d'imaxe previsibiblemente mozu, sabedor de que los nuevos adultos, los que van camín d'ello y, en xeneral, la lexón de derrotaos pol sistema educativu tienen verdaderes dificultaes pa usar l'"usté": atáscase-yos na boca, escuez-yos la llingua como escuecen les ingles los calzonciellos de perlé (siempre hipotéticos, ¡Dios nos llibre!).
D'otru llau, esta selmana, nuna sidrería, un camareru combayón tratóme de "caballero" ocho veces: una pal saludu, seis de los culetes y la despedida al pagar. Ún nun sabe que-y molesta más: les confiances en Shylock o los modales reverenciosos en Falstaff.
Pal casu que fuere, el mundu ta pates arriba. La Sociolingüística esplica que los rexistros formales (por exemplu, el tratu d'"usté") apaecen espontaniamente en situaciones trescendentes, ente elles les que traten de salú o perres, y desapaecen cola mesma espontaneidá nel ambiente afayadizu y despreocupáu de la barra d'un bar. Esto, visto lo visto, va pidiendo a voces una reformulación.
Otro tanto, la política de manual venía asignándo-yos a los partíos d'izquierdes la defensa combativa de los derechos de la clase obrera frente a los escuros abusos d'una oligarquía amazcarada detrás de la globalización, y agora vamos tener que-y agradecer a un oligarca filoproletariu l'enterramientu del Tratáu Tresatlánticu de Llibre Comerciu contra'l que puñó la nueva izquierda europea (los comunistes, según catalogación de Mercedes Fernández).
Vamos a ellos. Un documentu reciente de Podemos Asturies compara a Trump con Álvarez-Cascos (¡ejem!). Esplica que, lo mesmo que Trump pescó nes poces obreres descontentes del Mediu Oeste, Cascos echó la nasa, en 2011, nos barrios hermanos de les villes asturianes y sacó "votantes, hasta entonces fieles a la izquierda, de municipios industriales en crisis como Avilés y Gijón". Pa que nos entendamos: que Cascos empezó a tutear a los obreros, los xubilaos y los paraos mientres el PSOE seguía dándo-yos tratu d'usté.
Nel análisis de Podemos llama l'atención eso de "hasta entonces fieles a la izquierda". Ye mui de la izquierda'l mitu de la fidelidá cascadiza de los sos electores, xustificada de dos maneres: o por una pureza esquisita que nun acepta la mácula más diminuta nel partíu decepcionante o por candidez, por ser el votante una cabritina que se dexa engañar pol llobu que-y presenta la pata enfariñada. Yo roceo de les dos esplicaciones. Cuéstame creer qu'esistan tantos millones d'ignorantes. La xente, en xeneral, sabe lo que quier y caún va a lo d'él. L'obreru inglés poco cualificáu y aislacionista, lo más seguro, nun s'enquivoca cuando ve nel inmigrante polacu un competidor laboral, por exemplu. Evidentemente, esta integración de les reivindicaciones económiques de los desfavorecíos nun contestu ampliu d'insolidaridá frusta, atrasa o mata (eso namás lo va decir la Historia con mayúscula) el sueñu d'una Humanidá hermanada y feliz a mediu o llargu plazu. Pero ye que la xente, de siempre, quier comer a diariu y, últimamente, tamién-y apetez cambiar el teléfonu móvil cada añu: pa eso-y los resfrega la publicidá omnipresente pel focicu. Y eses apetencies son cosa independiente de los bonos sentimientos.
Permítame una observación: les primeres muestres d'esta nueva época ambidiestra, fusión a conveniencia de la izquierda y de la derecha, lleguen de países que falen inglés: países que, va cuantayá, superaron la disyuntiva lingüística ente "tú" y "usté". Por eso, yo nun acepto que la señorita telefonante del bancu me tutee. Hai muncho en xuegu.
