El pasáu xueves, una adolescente con sangre de faraones na palma de la mano, matriculada en secundaria nun institutu de Xixón (uso esti retorcimientu perifrásticu pa nun la ofender llamándola estudiante), púnxose a pegar voces pelos pasillos del centru, un profesor llamó-y l'atención, ella mandólu a tomar pol culo y él mandóla a tomar por xefatura d'estudios. La tradición amenazaba con que, llegada la díscola a esa dependencia, la verdasca (metafórica) de la xusticia reglamentaria cimblare nel aire. Pero, por alguna razón inesperada y misteriosa, la rapacina entró en xefatura nimbada d'un brillu d'inocencia calmante y apaciguador, o eso-y paeció al xefe d'estudios, que, anque notres ocasiones rectu executor del reglamentu insensible, esta vez quinxo llevala de vuelta al bon camín con una cenciella y bonal admonición. Y con eso, salió absuelta. Sé que fue asina porque'l xefe d'estudios soi yo.
A media mañana, vi en prensa qu'un paisanu de Sieru amnistió al raposu que-y entraba en gallineru y que-y matare dieciséis pites, dos coríos y una oca. Atrapólu indemne con una trampa pero depués entró-y pena del bichu y soltólu (eso sí: bien apartáu de Sieru, nos altos del conceyu Valdés, pa que-y mate les pites a otru). Hai semeya del animal tovía enxauláu. Mira con aire sumisu, indefensu, a los homes de los que-y depende la vida. Ún ta por dicir que lu arrodia tamién un nimbu d'inocencia, como de mártir infantil. Ayuda que tenga la boca cerrada y nun enseñe caniles.
Col correr del día, enteréme de que les tres xueces de Palma despidieren pacíficamente pa Helvecia al cuñáu del Rei d'España cuando se presentó a pedi-yos el parte de castigu (que, de toles maneres, tampoco prometía muncha sangre). Si lu fotografiaron nel momentu del beneficiu, yo nun lo vi, y siéntolo, porque podía valir pa saber si tamién a él lu arrodiaba una irresistible aureola de santidá.
Tanta benignidá coincidente, antinatural (polo menos en dos de los casos), empezando pola exercida por unu mesmu, diome que pensar. Algún vínculu tenía qu'esistir ente la xitanina, el raposu y el cuñáu del Rei d'España. Y, visto que los tres pertenecen a especies distintes, el vínculu tenía que ser esternu.
Carta astral del 23 de febreru de 2017. Signu solar: Piscis. Sensibilidá, compasión, tolerancia. Signu llunar: Acuario. Altruismu, empatía pa coles necesidaes ayenes.
Sí: la esplicación taba en cielu. Una combinación d'astros benignos protexía, por igual, al cuñáu del Rei d'España, a la xitanina adolescente y al raposu sanguinariu. Los astros ye lo que tienen: nun faen diferencies, son radicalmente democráticos.
-¿Y eso nun reza pa Rato y los condenaos poles tarxetes "black" el mesmu día?
Piscis nun llega a Madrid, cai mui p'adientro tierra.
Pero, a lo que vamos: algún provechu podremos sacar del casu. Por poner un exemplu: Ana García Boto, abogada del sindicalista José Ángel Fernández Villa, convién que lo piense dos veces primero de facer por retrasar más la comparecencia del so defendíu. El benévolu Piscis nun ye eternu. Depués vienen Tauro y Aries, que, ya se sabe, güelen a cuernu quemáu.
