Agradecida, Susana Díaz contó en Tele 5 (¡menudu sitiu pa contar nada!) qu'a la so puesta de llargu como candidata a les primaries acudieron militantes de toles partes de la Península, bien d'ellos en coche y faciendo hasta 17 hores de carretera. Vaya. Nun sabíemos qu'andaba tan fastidiáu el parque móvil socialista. Diecisiete hores de carretera, del sitiu más apartáu d'Iberia hasta la capital del Reinu, abulten munches hores. Si los problemes nun son del troncomóvil, van ser de la próstata del conductor.
Pero nes imáxenes grabaes del actu vese una multitú atlética, dispuesta a blincar de pies cuando la candidata-yos lo indicaba col crescendo al usu que gasta esta iletrada clase política actual que cambia l'arenga poles voces. Munchos de los aplaudidores sescudíen banderinos del PSOE, que ye lo que queda depués de quita-y a una bandera socialista el color, la foz y el martiellu y cambialo too por una firma grafitera, moderna: puru nominalismu llibre de carga simbólica. Movíense los banderinos rítmicamente, acompasaos, como mecheros de conciertu sabinianu. Pero al fondu, espurriendo la cruz percima d'ellos, destacaba una solitaria bandera asturiana ximelgada a 78 revoluciones por minutu: el kasachov en mediu un vals.
Esto ye una circunstancia incontestable: en cualquier actu públicu que se celebre p'alluendi'l Negrón y onde se muevan trapos emblemáticos apaez una bandera asturiana, lo mesmo da que se trate de prueba deportiva, manifestación antiabortista, concentración sindical o desfile de zombis. Suel ser única y nunca ta na primer fila: siempre pa la parte d'atrás, sescudida con rixu por mano anónima. Esti fue'l casu del día de Susana Díaz. Nun digo yo que nun hubiere otres representaciones patriótiques autonómiques presentes pero concentraríense toes nun planu distintu, escapando de l'asturiana o l'asturiana d'elles. O llegaríen enantes y ocuparíen les primeres files.
Y ye que'l conductor de les 17 hores a les que se refería la presidenta andaluza tuvo que ser esi retrasáu heraldu astur. La dilación del viaxe condenólu a la última fila y ellí lu teníemos desafranáu, arremangando porrazos col palu de la bandera nos cogotes de compañeros ortodosos, llibres del pecáu localista. Al militante astur de les 17 hores conocémoslu los aficionaos a cierta clase de cine. Llámase Albino Derechu y David Lynch fexo con él una película titulada "Una historia verdadera". Albino, que ya nun fue quien a que-y renovaren el carné de conducir la última vez que fue a la revisión, en 2005, subióse a la segadora en Perendi y enfiló pela carretera camín de la Villa y Corte a rendise a la esperanza trianera. Circulando pel arcén, arrascando chinchones producíos poles lates de cerveza que-y azotaben veloces conductores desaprensivos al adelantalu, puertu Payares arriba y Cazurrandia abaxo, Albino llegó a les puertes de la Feria de Madrid cola bandera azul de palu mayor de la segadora y la raya continua tatuada na córnea. Nun vamos dicir que blincó pa fuera la máquina: depués de 17 hores de vibraciones bastante fue qu'entrare nel pabellón dobláu, resfregando los reñones. Aforu a reventar, compañeru Albino. El discursu de la candidata, empezáu ya. Detrás del micrófonu, proclamaba un deséu: "No quiero que estas primaria se conviertan en una carrera?" ¡Eso sí que ye dar nel clavu!, asustóse Albino de la perspicacia de Díaz, y púnxose a sescudir la bandera, frenéticu. Qué razón tien ella. Tampoco fai falta correr a lo lloco. A trenta por hora llégase a cualquier parte, tamién a la secretaría del partíu. Lo importante ye tener una segadora y saber usala.
miliorodriguezcueto.wordpress.com
