Nun puede estrañar, nin tampoco tien qu'ofender, que David Palacio, el fíu del bomberu que morrió nel incendiu de la calle Uría d'Uviéu, aproveche un momentu de presencia pública pa espresar el desencantu de la familia coles autoridaes municipales, el disgustu por un tratu que considera inxustu. Lo de menos ye que los motivos sean reales o non. Les razones de los tribunales o de l'administración nunca son tan convincentes como les del amor. Esti rapaz quedó güérfanu a consecuencia d'un actu de valor del padre, una d'eses actuaciones que'l relatu optimista nel que nos eduquen siempre recompensa incondicionalmente, n'abertal, ensin parcelaciones, y nun fue asina nesti casu. La vida comportóse con David como una trilera y hai qu'entender que denuncie ganchos alredor.
El Facebook del ayuntamientu carbayón recueye semeyes del actu, una d'elles del alcalde desatapando la estatua conmemorativa n'homenaxe al difuntu y a otros bomberos muertos tamién n'actu de serviciu. Había un video, paez ser, onde se recoyíen les palabres fosques de David Palacio, y ya nun ta. Queda feo. Diráse que diba ser de fatos regala-y los propios medios a la crítica que te desacredita pero tamién hai elegancia y altura en facelo, más cuando'l denunciante ye un chaval desfavorecíu pola suerte.
Y nun ye menos feo que la oposición municipal aproveche esi dolor familiar con evidentes intereses electorales. D'agora pa en delantre y hasta mayu, ya lo sabemos, cada vez qu'un páxaru-y cague na cabeza a un calvu va haber responsabilidaes qu'echar en cara, d'una parte y de la otra. Pero esti asuntu ye más seriu, nun se remedia con resfregar el craneu con champú. Tampoco hai elegancia nin altura, por decilo suave, n'esplotar el sufrimientu ayenu, en facer caxa con él. Si a un conceyal-y duel, de verdá, que se silencie la protesta filial del rapaz güérfanu, en vez de tanta hipérbole mediática bien podía acercase al alcalde, nos pasillos de la casa conceyu, y, abriendo ampliamente los brazos a la conciencia del rexidor, solicitar, discretu, una rectificación que reponga'l video n'Internet. Si ye que de verdá se trata de los sentimientos del rapaz.
miliorodriguezcueto.wordpress.com
