1. Los parlamentarios autonómicos de Vox, consecuentes cola postura nacional (eso) del partíu, impidieron, esta selmana, una declaración institucional de la Xunta contra la violencia de xéneru. Nun-yos paez "que la diferencia de sexo sea el factor determinante en la violencia contra la mujer". Y ye verdá. El factor determinante ye'l pesu. ¿Cuándo se vio qu'alguién de cincuenta kilos-y ponga la cara como un mapa a otra persona d'ochenta? Y, anque los paisanos-yos solemos sacar a les muyeres diez, quince o venti kilos, ¿qué tien que ver el sexu con esa diferencia? A fin de cuentes, ¿cuánto pesen los atributos sexuales masculinos? Internet, que tolo sabe, diz qu'un testículu humanu anda pelos 25 gramos. Lo normal ye qu'un pechu femenín pese más. Quier decise que, si s'engarren una teta con un güevu (de varón), lo esperable ye que'l güevu acabe llevándoles. ¿Ónde ta, entós, l'abusu sexista? ¿A qué tantu victimismu feminazi? ¡Paez mentira que, quitando Vox, los demás partíos políticos nun lo quieran ver!
2. Cuenten los papeles que, nel cursu d'una comisión plenaria, la conceyala ovetense por Ciudadanos Yolanda Vidal fexo un chiste sobre un músicu folk muertu va poco. Hai discrepancies sobre l'homenaxe, con más traces d'insultu, que-y va facer el Concurso y Muestra de Folclore Ciudad de Oviedo a esti intérprete difuntu. Dixo la conceyala qu'ella nun tien una güija pa saber la opinión del muertu al respectu (anque ye fácil de suponer conociendo cómo vivió). La bancada del gobiernu municipal riose cola ocurrencia. Pero yo nun la acabo d'entender: ¿qué falta tien de güija la conceyala d'un partíu tamién difuntu, que los miembros, como ella, son Güestia de la política española, ciudadanos de la república de los que ya dieron les boquiaes?
3. El miércoles, los dos representantes de Vox nel parlamentu asturianu volvieron a facer el ridículu y el plenu riose d'ellos: gran aciertu. La risa (cuando ye una risa digna y nun naz a costa de los difuntos o de los indefensos) ye más eficaz qu'un enfrentamientu dialécticu pa desvestir impostores de la toga senatorial: cálza-yos zapatonos de la talla 50 y decóra-yos les narices con una bola colorada d'espuma. Hai que se reír más, muncho más, d'esta xente, hasta que l'elector sienta que la papeleta de los interfectos, en vez d'un votu encabronáu, patrióticu, señardosu y antisistema, ye entrada pa un club de la comedia vergonzante.
D'otra manera, ún quier felicitar a los parlamentarios Nuria Rodríguez (Uníes Podemos) y Álvaro Queipo (PP), que, coles sos intervenciones na fala eonaviega, propiciaron les protestes de la pareya monóglota por supuesta incomprensión lingüística. A Nuria Rodríguez, por nun ceder al requerimientu impertinente de la parlamentaria ultraderechista (que ya taba un plizquín cortada cuando-y pidió que cambiase al castellán: la risa precedente de la cámara empezaba a manca-y); a Álvaro Queipo, por evidenciar que l'amor a la llingua familiar ta percima de les ideoloxíes, nun tien que ver con militar na izquierda o na derecha.
miliorodriguezcueto.wordpress.com
