Una pena que los conceyales (una parte de los conceyales) de Xixón conviertan la Universidá Laboral notru más de los ya abondos factores de disensión y truñida colos qu'enguicen a les respectives claques. Ún ama la Uni porque entró nella con trece años, fechu un diablecu, y salió con diecisiete tresformáu nun pedante convencíu de los sos altísimos méritos literarios. Esa farruconería débo-yla a los kilómetros y kilómetros de piedra de cantería y d'azuleju de Talavera ente los que corrí como un cabritín, primero, y deambulé, depués, peripatéticamente trescendente, con Kafka acabante de descubrir gusmiándome'l sobacu (¡qué magnífica plaza pa Kafka la Uni, tan llena d'inalcanzables güecos misteriosos, evidentes dende l'esterior y a los que ningún pasillu llevaba!). Poblar en llibertá, ensin llendes, un edificiu d'eses dimensiones monumentales y d'esa nobleza, como facíemos los que yéremos alumnos nos años 70, modela'l carácter. Débo-y más a la condición envolvente de la Uni qu'a ningún profesor de los que me dieron clase. Había algo osmótico en calcase, indolente, contra les sos paredes: trescalábate una aspiración insaciable de glories que, anque pretenciosa, siempre va ser más digna, nel ser humanu, que la folganzanería.
Dicho eso, nun me paez razonable presentar la candidatura de la Laboral pal Patrimoniu Mundial de la Unesco. Nun-y veo posibilidaes. Piénsese que, en realidá, l'edificiu llevantóse antiayer, nun tien nin un sieglu de vida (de vides, meyor), nun protagonizó eventos históricos memorables y, pa enriba, ta inconclusu. Echar perres en preparar esa candidatura ye perder el tiempu y gastar mal. Y, ¿pa qué? ¿Por afalaganos l'orgullu localista? ¿Más tovía?
Pero, de toles maneres, ¡qué argumentación más ridícula la del equipu de Gobiernu municipal, cola alcaldesa al frente, refugando la propuesta pol "pasáu franquista" del edificiu! Nun-y vagó a Xixón roba-y la Laboral al réxime, enantes, incluso, de que morriere'l dictador. Fue'l recréu de final de selmana de les families obreres, que gastaben, plácida y humildemente, los sábados o los domingos soleyeros de la primavera o del veranu, con bocadillos y refrescos, nos xardines de pa escontra la carretera de La Villa. Ellí pudiemos garrar una raqueta, la primer vez, los neños que nun teníemos perres pa ser socios del Grupu Covadonga, mientres los padres, sentaos nes grades de piedra d'aquelles toscones pistes deportives, arimaben a la oreya la radio de piles y les madres siguíen, a la sombra fresca de los pláganos, cola so infinita llabor de puntu. La Laboral ye la pebida de Xixón... o yéralo hasta que la tresferencia de competencies educatives desahució a la ciudadanía. Censurar la Uni por franquista ye lo mesmo que tachar de monárquica la estatua de Pelayo de la Plaza'l Marqués. Son símbolos de la villa. Hai que ser de fuera pa nun lo entender.
