El sexu de los ánxeles nun ye'l de los adolescentes y la Fiscalía de Menores d'Asturies nun peca de bizantina poniendo'l tema enriba la mesa de debate. Avisó estos díes el fiscal, Fernández Caldevilla, que cada vez hai más esibicionismu con granos circulando peles redes sociales y que ye consecuencia del fácil accesu a la pornografía de chavales impúberes o casi. Pocu valir tien l'aquiescencia del ignorante que suscribe, pero cuéntese con ella. Raru será l'estudiante de Secundaria que nun lleve, vea o tenga visto en teléfonu coses que'l caudillu Francisco Franco nun llegó nin a imaxinar, por poner un referente adultu, cristianu y formal d'aquella España estragada de valores, fumu de les chimenees del tiempu que l'airón tecnolóxicu esvaneció. O tempora, o mores!
Pero'l que suscribe (que nun dexa de ser menos ignorante nel segundu párrafu de lo que yera nel primeru) discrepa nun par de coses col señor fiscal. Una d'elles, cuando Fernández Caldevilla pide más control del usu de teléfonos móviles nos centros educativos. Los institutos (que ye de lo poco de lo qu'esti burriquín sabe algo porque lleva 34 años comiendo, metafóricamente, de la tiza) tán en guerra franca contra los móviles, son la vanguardia nesa batalla perdida a priori. Si nun fuere polos institutos y les escueles, y les medíes qu'adopten motu proprio, diben ser 300 y non 30 los casos d'acosu a menores y divulgación de semeyes comprometíes que la Fiscalía de Menores tramitó l'añu pasáu. Más nun se puede facer, como nun seya machaca-yos los móviles a martillazos a los guajes. Pero l'enemigu ye duru, resístese. Cuando se retira un aparatu por usu improcedente, y siempre después d'avisos repetíos, nun ye raro que vengan madre o padre a reclamalu, indignaos y enguizaos pol fíu con mono, alegando que son los propietarios. Amás, d'otra manera, los chats chiven el momentu de cada comentariu, cada insultu y cada foto y, mayoritariamente, nun suelen coincidir col horariu escolar: son frutu del ociu vespertín o de los desvelos nocherniegos.
Ya puestos a disentir, tampoco ta ún mui seguru de qu'esta afición de los rapacinos a la semeya nudista vaya tener consecuencies nel so futuru laboral, como'l fiscal afirma. Sí: Izan o Ainara van quedar pa siempre en pulguina, o poco menos, delantre l'espeyu del cuartu bañu, metiendo tripa de mediu perfil, chupando l'interior de los carriellos y aguantando'l móvil que los esculpe con chulería que quier ser interesante; sí: l'improbable empresariu de 2040 o 2050 qu'estudie contratalos va pegar una vuelta pelos sos antecedentes en Google, seguro... y nun los va alcontrar mui distintos de los d'él mesmu, de los de tol mundu de la so quinta, nada que lu escandalice como cosa nunca vista, nada que suponga impedimentu pal desempeñu profesional... Hai que se facer a la idea: los electores del mañana escoyerán a más d'un presidente, a más d'una presidenta, conservaos pa la posteridá en dixitalizada desnudez xuvenil, y a nadie va espantar, lo mesmo qu'hoi nun nos espanten gobernantes que se presenten revelando la so condición homosexual o con un tatuaxe arrepegándo-yos pel pescuezu p'arriba, por facer referencia a tabúes d'un pasáu bien reciente.
miliorodriguezcueto.wordpress.com
