1.- Na polémica del Muru de Xixón, ún ye partidariu del tsunami. Nun me refiero a l'alcaldesa: digo un tsunami de verdá, un supercachón qu'invada l'avenida Rufo Rendueles y desfaiga lo nuevo y lo vieyo, les barandes cíclicamente ferruñoses y el cascayu recién pintáu en suelu qu'albidramos desteñible; un tsunami xusticieru y purificador que-yos meta ocle, oricios y furagañes pela ventana a los rascacielos que-y dan sombra a la sablera a les cinco de cualquier tarde del veranu; que retraiga la Historia 200 años y devuelva a les marees lo que la ciudá-yos robó; qu'arrample cola estatua del xenocida romanu nel Campu Valdés y, en compensación, tresforme San Pedro nun templu al dios Neptuno; que surfee, indiscriminadamente, coches, bicis, monopatines, "runners" y pasiantes colesterólicos hasta lo cimero'l Coto; un tsunami dixebrador qu'aísle la tontería esclusivista del este y la golfería nocturna del oeste de la concha a los sos destinos diverxentes; un tsunami subversivu que blinque percima la casa conceyu y estrocie les banderes, que meta los deos peles ventanes del edificiu y tresforme los despachos edilicios en peceres; un tsunami democráticu que-y quite la razón a tol mundu por igual.
2.- En funciones de Xefatura d'Estudios, recibí va nada, nel institutu, a una madre enfadada porque'l fíu, nesti cursu benevolente acabante consumise que-y dio la patada p'arriba al alumnáu de manera indiscriminada, ye la escepción repetidora. ¡La culpa del fracasu del rapacín ye del tutor del grupu y de los profesores, que nun lu atendieron como teníen obligación de facer! "¡Desde marzo que llevan sin trabajar y cobrando un buen sueldo!", dispara la madre resentida. "Crítica" ye un sustantivu que, hoi, nun acepta prefixu. La desgracia siempre ye inmigrante y los remedios que la combatan han venir, imperativamente, tamién de fuera, de los demás o del Estáu parental. Por eso, enfadámonos cuando la espectativa de felicidá, prometida por tantos canales, nun se cumple, y protestamos por tener que llevar tovía fociquera o porque'l neñu suspende lo insuspendible: ¿cómo ye que nun nos lo iguaron?, ¿qué cuentu ye esti?, ¿voi tener que me poner yo a arreglalo?, ¡home, ho!
¡Un tsunami, por favor! ¡Un tsunami!
miliorodriguezcueto.wordpress.com
