La visionaria esploración de los fondos oceánicos qu'ufiertó, en 1870, l'escritor francés Jules Verne na so famosa novela d'aventures "Venti mil llegües de viaxe submarín", cola narración que contien detallaes descripciones paisaxístiques y zoolóxiques, sigue siendo un viaxe estraordinariu, pero pasó del territoriu de la ficción al de la realidá de la investigación oceanográfica. El sucesores del "Nautilus" y otros artefactos navales que la meyora de la tecnoloxía fixo posibles suministraron información ya imaxes d'un mundu d'otra manera acutáu al home, somorgiáu en tiniebles, fríu y afaráu.
La última frontera de la esploración zoolóxica del océanu tien nome propiu nel Cantábricu asturianu. Dos, para ser esactos: el cañón d'Avilés (un complexu d'esgoladeros submarinos) y la cala d'El Cachuchu o bancu Le Danois. Dambos alluguen una estraordinaria riqueza de fauna, consecuencia mesmo del so propiu efectu topográficu, que modifica les corrientes, inflúi na circulación y na distribución de los nutrientes, y multiplica los hábitats disponibles, como de la so situación bioxeográfica, n'una zona de transición ente un mar fríu, escontra l'Este, y otru más templáu, escontra l'Oeste. Un edén somorguiáu -mas d'apariencia nada idílica- al que los científicos asomáronse al traviés de los proyectos oceanográficos "Ecomarg" y "Indemares": un ventanu entá enteabiertu a un universu aisllao y único.
El balance de les cinco campañes desenvueltes nel marcu del proyectu oceanográficu "Indemares" (Inventariación y Designación de la Rede Natura 2000 n'Árees Marines del Estáu Español) nel cañón d'Avilés (unu de los más fondos del mundu, col so puntu más baxu a 4.750 metros, casi un Mont Blanc "invertíu") inventarió nada menos que 1.389 especies de fauna, de les cuales una ventena abulten ser nueves para la Ciencia. De la mesma, el proyectu "Ecomarg" (Estudiu del Ecosistema de la Plataforma Marxinal Asturiana) catalogó más de 550 especies (siquier dos nueves) na cala d'El Cachuchu (bancu Le Danois), un monte submarín con 4.000 metros de desnivel (daqué más qu'el Teide) alcontrada a 38 milles náutiques de la mariña riosellana.
Son los territorios de dos de les criatures más grandes del océanu, el cachalote y el calamar xigante, y tamién l'hábitat de miríades de diminutos crustáceos nadadores que sofiten les redes alimentaries marines, lo mesmo que de corales, esponxes y tiburones de fondura. Amás, grandes bancos de pexes d'interés comercial busquen comida o abellugu nellos.
