L'asociación Iniciativa pol Asturianu reclamó esti martes a PP y Ciudadanos que cumplan cola Llei d'Usu nel Conceyu d'Uviéu. Nesi sentíu, reclamaron que na señalética nueva tenga presencia l'asturianu.
Al traviés de nota de prensa, Iniciativa recuerda que'l Conceyu anunció esta selmana'l cambiu y esplica que la presencia del asturianu na mesma "nun va xenerar nengún costu adicional al contratu". "La capital d'Asturies nun puede quedar nun cercu nel que nun se faiga un usu normal del idioma y de la toponimia oficial dende la municipalidá", señalaron.
Nesi sentíu, recordaron al PP que nes ciudaes gallegues onde gobiernen usen el gallegu y a Ciudadanos qu'utilizar l'asturianu ye dalgo que marca la Llei d'Usu. "Tanto'l PP como Ciudadanos tienen la oportunidá de cumplir la Llei d'Usu, qu'hai que cumplila, desarrollarla y dar exemplu", afirmaron
Amás, Iniciativa pol Asturianu solicitó la presencia de la llingua asturiana na programación d'esti Xacobéu 2021. Dende la organización apuntaron que "la conmemoración del Xacobéu d'esti añu, qu'entamó con Alfonso II dende Uviéu, ye una oportunidá mui bona pa promocionar l'idioma como faen los gallegos col suyu", según informa EUROPA PRESS.
