TPA estrena una serie documental de cinco capítulos sobre l'horru

TPA estrenó esti miércoles, día 20 de xineru, a les 22.30 hores, 'L'horru', una serie documental de 5 capítulos que nos avera al mundu del horru asturianu pa tresmitinos el so valir testimonial, técnicu y artísticu, y la so vinculación sentimental col pueblu que lo diseñó.

Esta producción cinematográfica realizada poles productores asturianes, La Rebequina y Art&Life, va mostrar cada horru d'una forma nunca vista hasta la fecha. Al traviés d'imáxenes aérees y lluz nocherniega van vese los horros como monumentos .

En cada capítulu, 'L'horru' percuerre un sieglu na historia d'Asturies al traviés de los sos horros y paneres, del sieglu XVI a l'actualidá. Nuna autocaravana, el periodista y director Jaime Santos percuerre tola xeografía d'Asturies pa ver cómo se constrúin y cómo se treslladen los horros, la so evolución a lo llargo de los sieglos y la so adaptación a les necesidaes de cada dómina.

Nel espaciu tienen protagonismu los carpinteros y armadores, persones que faen del so horru un espaciu esencial nes sos vides y etnógrafos, historiadores y xente apasionada na busca de tolos secretos y mensaxes qu'escuenden los horros y paneres d'Asturies.

Nel primer capítulu, 'L'horru' viaxa hasta Villaviciosa, Grau y Quirós, onde tán los exemplares más antiguos, y cuenta cola intervención de pioneros nel estudiu del horru como son Juaco López, Armando Graña o Astur Paredes, qu'empezaron a ver la riqueza y antigüedá del horru nos años ochenta del sieglu pasáu; l'arquiteutu de Villaviciosa Xuan Pedrayes, el carpinteru y historiador Xune Zapico, autores de teoríes y estudios evolutivos del horru y la etnohistoriadora y esperta en patrimoniu, Cristina Cantero, autora d'un documentu marcu qu'analiza la situación actual del horru, según informa EUROPA PRESS.