Siendes llenes de baches, espacios verdes estrozaos pola roxura del xabalín y un centru d'interpretación “obsoletu” al qu'hasta-y robaron los canalones de cobre un poco primero de Navidá. El parque natural del Monte Deva, pese al repique de turistes qu'esperimenta dende l'entamu de la pandemia, “pide a gritos” un plan de meyora en fondura. Asina lo piensen tanto los trabayadores como los visitantes avezaos, qu'apuren, sobremanera, l'arreglu de los baches en bona parte de los caminos d'accesu. “Asina nun presta xubir nin andando nin en coche”, critiquen. El Conceyu de Xixón comprometióse a intervenir nos próximos meses.
La idea del gobiernu local, que yá tien el primer borrador del plan director pa la reforma, ye centrase en dos aspeutos básicos: acondicionar y señalizar les siendes y remocicar y ampliar el centru d'interpretación. A xuiciu del personal del parque, dambes llínees de trabayu son “bien necesaries”. “Les rutes nun tán señalizaes; si nun vas con guía ye fácil que te pierdas”, dicen los trabayadores. Tocantes a la reforma del muséu, al so xuiciu, tendría de centrase en tirar parés para llograr un espaciu más diáfanu. La distribución actual del edificiu ta compartimentao en sales estremaes a les que solo se puede aportar dende fora, porque caúna tien la so puerta y nun hai nenguna que les comunique nel interior, asina que los trabayadores de recepción tienen d'acompañar a los visitantes a la salida pa volver entrar otra vueta nel local que quieran visitar. “Fai qu'estéticamente nun sía curioso nin eficiente, lo lóxico sería qu'una vegada dientro del centru nun tuvieres que salir pa ver, por casu, la sala d'esposiciones. Hai que reorganizalo”, razonen los trabayadores. Esperen que, de camín, la reforma traiga consigo un allampáu sistema de calefacción en tol interior y una revisión completa de los interiores, “que nun se tocaron dende 2002” y quedaron “anticuaos”.
Especial importancia tien de garrar, creen, la sala espositiva, que tampoco sufrió casi cambeos nos sos 19 años de vida y fai que los visitantes que lu conocieron entós nun vean necesario repitir la so escapada. Esti centru d'interpretación, sicasí, “tien potencial enforma”, a xuiciu de los trabayadores. Y tienlu porque pol so allugamientu puede convertise en “un puntu d'alcuentru tanto pa los curiosos que s'averen al parque natural solo pa comer al aire llibre en familia como pa los qu'entamen una ruta pel monte. Calculen qu'al añu avérense al llugar 5.000 persones. Son, na “gran mayoría”, neños adscritos al programa escolar de talleres en Monte Deva, un plan qu'agora mesmo ta peslláu poles restricciones del coronavirus pero que se vio compensáu pola llegada de curiosos en busca d'espacios verdes al campu. “Foi bestial, les actividaes de la fin de selmana yá tán toes reservaes y dende va meses vese a xente perequí si'l día acompaña”, aseguren.
Per otra parte, Cristian Puerta y Noemí Rivero, que s'averaron esti día al área recreativa del parque pa comer colos sos amigos Silvia Martínez y David Palacio, reconocen que yeren bien fieles nes sos visites al Monte Deva va años, pero que la redolada dexó d'interesa-yos abondo d'un tiempu acá. “Namás hai que ver cómo ta esto, estrozao polos xabalinos”, comentaba David Palacio, señalando los grandes carcavones que se dexen ver per tol campu. Tamién creen que s'animaríen a facer más rutes si hubiera señalizaciones qu'indicaren qué siendes lleven a dellos picos cercanos. Lo que más apura, añeden, son los accesos. “Pel branu hai tanta xente y coches que nun se puede pasar de nenguna forma; taría bien qu'hubiera accesos namás pa persones que quieren xubir caminando”, proponen.
