Magdalena Oriol Dispert entró en siella de ruedes na cafetería del centru xeriátricu Costamar, en Balbín, onde Lluanco empobina escontra Bañugues. Yeren les 10 y media de la mañana. Peináronla cola melena blanca pa tras, vistíu con chaqueta negra, blusa blanca y pantalón de cuadros y calzáu con unos zuecos y viose, de secute, recibida por media docena d'enfermeres, una docena de trabayadores, la dirección del centru... Magdalena tien 103 años y dixéron-y, nesi tonu únicu que s'emplega colos vieyos y los neños, que taba bien guapa y que-y diben a poner la segunda vacuna.
Emocionóse y dixo llorando.
–El mio fíu ye bonu como'l pan, pero que nun puede ser...
Nun pudo ver al so fíu porque vive en Benidorm y porque la residencia cerrar a visites los 8 díes siguientes a cada vacunación. La d'esi día yera la segunda. Tolos vacunaos yeren veteranos. Y viceversa. Amás, Gozón tenía declaráu'l zarru perimetral.
En cinco minutos yá ta vacunada y, nunos díes, va tar lo más protexía que se puede contra la covid-19. A la fin de la mañana, taríen como ella 90 residentes más y 29 de los 53 trabayadores.
El percorríu pa esa vacunación empezara dos hores enantes, na xerencia del Hospital San Agustín, frente al despachu de Ricardo de Dios, onde se concentraron dos de los seis equipos d'enfermeres que faen la vacunación de la área sanitaria III. Dos xeneraciones. Ángeles Gómez tien 35 años d'esperiencia; Yoana Martínez, 27. Rosa Isabel Fernández, Lara Rodríguez y Roberto Dorrego (que s'incorporó dempués), 6 años y Cayetana Arias, 5.
La vacuna de Pfizer ye la más delicada de les que tuvieron que poner nes sos carreres. Lléga-yos desconxelada, pero caltiense y tresportase nunes neveres que caltienen los viales ente 2 y 8 graos rexistraos por un termómetru incorporáu. A caún d'estos pequenos frascos de vacuna tienen que añedir una cantidá de sueru salín fisiolóxicu. De caún d'ellos han de salir seis dosis.
La midida tien que ser perfina porque esos viales son abondosos pa 5 dosis (les que sacaron na primer vacunación) pero xustos pa seis. Si se pierde una gota piérdese una dosis.
La vacuna ye la midida de too l'operativu. Hai dos equipos de más pa la área sanitaria III por si falla daquién. Les enfermeres faen turnos de mañana y tarde pa tener vacunaos, dende'l martes hasta'l vienres, a los casi 2.000 residentes y trabayadores de les 26 residencies qu'hai na área. Hai dalgún trabayador que nun ta previsto vacunar nesti día, por si falla daqué.
El miércoles, estos dos equipos teníen previsto facer cinco residencies. La primera y más grande yera Costamar, na que trabayaron xuntos. Los sanitarios llegaron en tres turismos coles dos neveres pela AS-238, la carretera qu'en 14 kilómetros, curva a curva, va camudando les chimenees poles palmeres y, rodando per un paisaxe blandu de camperes, acaba baxando al mar.
La residencia llevantóse como hotel de dos plantes con terraces que dan al mediudía que tienen un horizonte de Lluanco y Cantábricu. Ye privada pero'l 40% de les places son concertaes.
La xerente, Begoña García, cuenta que nun tuvieron nengún casu de coronavirus. Desque empezó la pandemia nun acoyeron a nuevos residentes y tienen diez habitaciones pa l'aislamientu, de 7 o 14 díes (según variaben les ordenances) pa cuando dalgún salía al esterior pa una consulta médica o otra causa. Describe que la mayor parte de los residentes son d'Avilés y de Gozón, hai pocos dependientes y mayoría de muyeres.
Madalena Oriol ye catalana y vino col so home, que tenía una empresa de tresportes de les que se desenvolvieron alredor de Ensidesa. Enviudó bien moza y sacó al so fíu alantre.
–¿Va venir?
Preguntó, pero sabía que la respuesta yera non. La dulda sonaba más a la esperanza d'una sorpresa qu'a un despiste. El martes dixera na residencia que-y diba mandar una semeya fecha mientres la vacunaben porque sabía que yera bono para ella.
A les 9 y 25 de la mañana, una hora primero de que la vacunaren, entraba la lluz crudo pelos ventanal de la cafetería que yera, claro, el meyor llugar pa pinchar al personal. Un espaciu ampliu con una ventena de meses bien dixebraes entre elles, unes con sielles y les arimaes a la televisión, con butaques. Una barra en forma d'O distribúi l'espaciu diáfano con distintes cubiertes y colores para suxurir ambientes más atopadizos.
Les enfermeres taben alredor de dos carrinos de plásticu arimaos a la parte más estrencha de la barra, preparando les vacunes, un procesu de midida que desafía la presbicia y precisaba una lluz daqué meyor. Vistíen piyames azules desechables, que se mandaron xunto a otros materiales sanitarios a la residencia primero de qu'elles llegaren. Ye asina en cada centru al qu'aporten. Tou nuevo a estrenar pa profesionales desinfectaos de siguío.
Usen guantes, muévense con precisión y desenvolvieron estratexes pa nun perder la cuenta de lo que faen, anque tean falando y se faigan entrugues. Recibieron una formación telemática y comparten información con otros grupos.
Con un movimientu de muñeca de 180 graos, xiren y vuelven diez vegaes cada vial enantes y depués d'entemecer la vacuna col sueru. Llevanten la xeringa, abirolen pa buscar la raya del 0,3 -recuérdese, como nuna reloxería líquida, la exactitú depende d'una gota- y guarden la xeringa preparada embaxo un mantel pa guardala de la lluz el pocu tiempu que va pasar hasta que llegue al músculu cimeru del brazu d'un paciente.
Juan Enrique García, médicu d'urxencies del San Agustín, ta de sofitu por si se produz cualquier incidencia médica. La más tarrecida ye la reacción anafiláctica. Estadísticamente, anden polos 11 casos per cada millón de persones. Van forníos con desfibrilador, osíxenu y medicación.
–Nun tuvimos nengún en más de dos mil que llevamos puestes, diz Cayetana Arias, que rexistra nel ordenador cada vacunación y cada non vacunación, si fuera'l casu.
El primer residente en recibir la vacuna foi Benigno Rodríguez García, que lleva 7 años nel centru y que trabayó na mar dende los 14 años. Salió al bonitu, foi a la pareya y navegó muncho 30 años en mercantes. Tien 86 años y mediu y adelantráron-y la vacunación por que pudiera dir a la consulta del médicu n'Avilés y que-y mirara un deu que llevaba vendáu.
Ye solteru y un sobrín espéralu fora.
Nun tarreció a la vacuna que-y va dexar siguir faciendo la so vida.
-Comer, tar sentáu y ve la tele.
Cuando l'equipu 2 termina de vacunar al personal, l'equipu unu empieza colos residentes, a los que pinchen nes sos habitaciones. Vacunar ye lo más fácil. Lo más pesao fueron los preparativos.
Magdalena quier un bombón y va tenelu. Présta-y el chocolate. En 2021 tien que cumplir 104 años.
