GameStop, una franquicia norteamericana de tiendes de videoxuegos que llegó a tener establecimientos per tol mundu –n'Asturies tuvo ún nel centru comercial del palaciu de Calatrava–, yera dende va unos años una empresa al debalu. Afogada poles perdides y enllancada nun modelu de negociu obsoletu. Los fondos especuladores golieron el sangre y empezaron a apostar a la baxa por ella con posiciones curties (con vientes d'acciones que tomaben emprestaes y que depués mercaben a la baxa, llogrando como beneficiu la diferencia). Esos movimientos de los "baxistes” provocaron una cayida ensin frenos de les acciones de GameStop. Pero tou camudó cuando los usuarios d'un foru d'internet d'Estaos Xuníos (similar al forocoches español) se tiraron al rescate de la marca. Agora GameStop val tantu na bolsa de Nueva York como Tesla, y más que Delta Airlines o Kellogs. 

“Lo que ta pasando ye daqué histórico”, asegura'l llangreanu Rubén Vilela, profesional de les operaciones de compraventa d'activos nos mercaos financieros y que foi designáu meyor “trader” (inversor en Bolsa) español. Ye la rebelión de los pequeños contra los especuladores. Una nueva especie de “Robin Hoods” bursátiles. “Esto sienta un precedente y nun va acabar equí”, aventura Vilela, que nun-y quita la vista estos díes a los mercaos americanos. Nin él, nin los sos collacios “brokers” (inversores bursátiles que trabayen pa veceros), que nun posen el plasmu. 

Too surdió nun foru d'internet llamáu Reddit nel que mozos americanos alderiquen sobre temes de lo más diverses, dende la convulsa política nacional, hasta asuntos más banales como la final de la Super Bowl de la selmana qu'entra. Ellí, un grupu de mozos de “ente 16 y 25 años”, matiza Vilela, decidieron xuntar fuerces pa llanta-y cara al fondu d'inversión que quería aprovechase del fundimientu de GameStop. Y el poder de convocatoria foi brutal. “Caún invirtió ente 600 y 1.000 dólares (ente 500 y 800 euros) y fixeron que'l mundu enteru tea al tantu d'ellos”, señala Vilela. 

A los que nun-yos fixo tanta gracia ye a los especuladores del fondu que taba intentando espelleyar a la compañía de vienta de videoxuegos. “Esto costaría-yos el puestu de trabayu a munchos, tán perdiendo bien de dineru”, destaca Vilela. 

Y ye que GameStop pasó en solo una selmana de nun valir nada a ser oru bursátil. Inclusive, la Reserva Federal viose obligada a intervenir y prohibió a los “brokers” y “traders” profesionales invertir nesi valor nun intentu d'aselar les agües. Lo que cabrió a munchos d'ellos. Ente ellos, a Vilela. “Nun ye xusto. Nós pagamos por operar nesos mercaos. Ye como si pagues por ver la Fórmula 1 y quítente la imaxe a metá de la carrera”, señala. 

El casu ye que los foreros americanos tán consiguiendo'l so propósitu y poniendo nel güeyu del furacán bursátil a los fondos que se dediquen a fundir empreses. “Esti en concretu, el qu'entrara en GameStop, diba acabar con ella, teníalo claro”, resalta Vilela. L'asturianu señala que tou esto abre inclusive un alderique moral. “¿Por qué nun hai alarma cuando un ‘hedge fund’ (lliteralmente, un fondu de cobertoria) funde a un valor, a una empresa, y sí lo hai, como agora, cuando'l pueblu se llevanta en contra d'estos fondos?”, plantega. Y ye que la unión d'estos "foreros” ta afalando tou tipu d'especulaciones n'América. Una de les teoríes más espardíes ye qu'el excéntricu multimillonariu Elon Musk, dueñu de Tesla y de SpaceX, ye el que ta orquestando tola operación na solombra. “Lo que ta claro”, añede Vilela, “ye qu'esta ye una llucha de David contra Goliat, ye daqué hestórico que va sentar precedentes, nun se sabe entá si positivos o negativos”. 

Los foreros” de Reddit yá tán buscando a nueves empreses en crisis pa sacales de les garfies de los especuladores. La siguiente paez que va ser la cadena de videoclubs Blockbuster, que llegó a tener delles tiendes n'Asturies y que lleva una década en perdes. Les sos acciones xubieron un 6.000% estos últimos díes.