Güelpe de timón na Ópera d'Uviéu. La Fundación qu'entama la temporada llírica uvieina desfaese del so coru, que va pasar a ser esternu y profesional. Asina lo comunicó'l director de la Ópera, Celestino Varela, a los componentes de la masa coral que participen nos títulos de la temporada. 

“La Fundación Ópera d'Uviéu va entamar un procesu pa camudar el modelu de xestión del colectivu coral que participa davezu na temporada operística”, esplicaron los responsables de la entidá nun comunicáu. Pa ello, abrióse un plazu del 12 al 26 de febreru, pa que los interesaos (particulares, empreses o instituciones) presenten les sos propuestes. La Fundación va entrevistase colos interesaos y a lo llargo del mes de marzu de 2021 va adoptar una decisión al respeutu. 

La Ópera d'Uviéu nun afitó entá la duración d'esi contratu cola persona, institución o empresa que se faiga cargu del coru. “Son coses que se van tener que falar mientres el procesu”, apuntaron dende la Fundación. Lo que sí tienen claro ye que “va tener que ser daqué estable”. Ello supón que nun se contratará a un coru pa cada temporada. 

Ópera d'Uviéu asegura qu'encara “con enorme ilusión y enfotu” esta nueva etapa nel aportar del ciclu operísticu y reconoció a los actuales coristes la so “enorme entrega y amor a la llírica”, máxime nuna temporada enllena de dificultaes como la que s'acaba de completar. Coles mesmes, manifestó-yos la so esperanza de que tolos qu'asina lo deseyen “puedan incorporase a la nueva propuesta”. 

Ún de los requisitos que la Ópera d'Uviéu va plantegar a los interesaos na xestión del coru va ser que los integrantes vian n'Asturies o en comunidaes autónomes vecines, tal que foi habitual hasta agora. 

Una de les soluciones que s'embaraxaron nel so momentu y que nun se refugó ye que los actuales integrantes del coru de la Ópera se constituyan en cooperativa qu'ufierte los sos servicios a la Fundación. 

La decisión de la profesionalización del coru de la Ópera tien el so orixe nel procesu xudicial que la Tesorería de la Seguridá Social abrió en 2019. “A la vista de les diferencies de criteriu, y pa evitar mayores perxuicios a futuru, la Fundación Ópera d'Uviéu decidió dexar de tutelar el coru y abrir un períodu de busca y selección de nueves alternatives”, conclúi'l comunicáu de la Fundación. 

El pasáu mes de xunetu, la Sala de lo Social del Tribunal Superior de Xusticia d'Asturies (TSXA) ratificó una sentencia anterior –la del Xulgáu de lo Social n.º 3 d'Uviéu– que condergaba a la Fundación Ópera d'Uviéu por nun tener en nómina a los 76 miembros del coru. El TSXA condergaba a la Ópera a pagar 273.247,13 euros a la Seguridá Social pola falta d'alta y cotización de los coristes nel periodu que foi ente xineru de 2015 y setiembre de 2018. Amás, la sentencia impón a la Ópera'l pagu de les costes procesales. 

Contra esti fallu, la entidá presentó un recursu de casación pa la unificación de doctrina, pero entiende que la resultancia va ser asemeyao y por eso decidió dexar de tutelar el coru y externalizar la so xestión.