Asturies yá tien más de 600 megavatios (MW) de potencia eólica instalada en poniendo Iberdrola en marcha trés nuevos parques d'aeroxeneradores que sumen 92 MW. La potencia eólica na rexón yá ye cimera a la del grupu dos de la central térmica de carbón d'Aboño, l'únicu que sigue operando con regularidá n'Asturies y el que tien más capacidá de xeneración (556 MW). Un exemplu de la transición a les anovables. 

Iberdrola, que l'añu pasáu desconectó la central de carbón de Lada, activó los parques eólicos de Cordel-Vidural (37 MW), Capiechamartín (34 MW) y Panondres (21 MW), toos asitiaos nun cordal que comparten los conceyos de Navia, Valdés, Villayón y Tinéu. Con estos parques, la potencia eólica instalada n'Asturies xube a 610 MW partíos en 22 parques. 

Iberdrola yá tenía dos parques d'aerogxeneradores operativos na rexón (El Candal y El Segredal) y trabaya na construcción d'un sestu, el de Verdigueiro (36 MW), en llogrando l'autorización alministrativa. Coles sos nueves instalaciones, que sumen 128 MW eólicos, Iberdrola va triplicar la so capacidá anovable n'Asturies. 

Fontes de la compañía destacaron que la práctica totalidá de los “complexos” trabayos de campu y d'obra civil de los sos nuevos parques eólicos realizáronse por empreses asturianes, como Hormavasa y Horvalsa, Canteras Rencanos, Deymet, Excade, Posada, Méndez y Mota, Gruas Roxu y Taxus. La promoción foi desenvuelta por Erpasa y la fabricación de les torres de los aeroxeneradores realizóse nes instalaciones de Windar, n'Avilés. “La construcción de toos estos proyectos, con una inversión de 100 millones d'euros, ta contribuyendo a la dinamización del texíu industrial y l'empléu local, cola involucración d'hasta 1.000 profesionales”, apuntaron fontes d'Iberdrola, que tamién destacaron que n'operación, los nuevos parques eólicos van xenerar enerxía pa bastecer a más de 100.000 llares y van evitar la emisión a l'atmósfera de 65.500 tonelaes de dióxidu de carbonu al añu.