La Televisión del Principáu d'Asturies (TPA) estrena'l miércoles 24 de febreru a les 22.30 hores 'Tierra de quesu', una serie documental centrada nel mundu queseru asturianu.

Trátase d'una road movie qu'afonda nes variedaes, na historia y na ellaboración d'esti productu, amás de la vida de los sos productores artesanos y de les dificultaes a les que s'enfrenten.

El realizador ribeseyanu Pablo Casanueva dirixe esti proyectu de cuatro capítulos, conducíu pol cocineru y consultor gastronómicu Lluis Nel Estrada. Esti espertu gastrónomu guía al propiu Casanueva pela xeografía asturiana, percorriendo dalgunes de les queseríes artesanales.

La serie ta grabada dafechu n'asturianu y foi seleccionada na convocatoria extraordinaria 'Asturies crea Sinerxes', desarrollada pola Conseyería del Cultura, según informa EUROPA PRESS.