Nun ta claro si Javier López Muñiz quixo escribir sobre un príncipe mozu o sobre un galeón. D'entrambos dos trata “El primer viaje de Carlos de Hansburgo a España y el hundimiento del Engelen”, un llibru de más de 500 páxines, nel que, como nun puzle, recompón un episodiu decisivu na hestoria d'Occidente, y qu'acaba de ver la lluz col impulsu de les fundaciones Cardín y Alvargonzález. L'historiador madrilanu xunió nun relatu y un destín común al futuru emperador y al barcu nel que, en 1517, desembarcó nel puertu de Tazones, en Villaviciosa. Tan apasionante ye la hestoria d'unu como la del otru. La de Carlos I d'España y V d'Alemania ye de sobra conocida; la del “Engelen” non tanto, y nella enxaréyense intrigues béliques, polítiques, diplomátiques ya inclusive amoroses. 

El primer viaxe de Carlos de Habsburgo-Trastámara a España ye ún de los trés viaxes en barcu que camudaron la hestoria d'España y del mundu. Asina lo entendía l'historiador Claudio Sánchez Albornoz, al que Javier Muñiz cita al entamu del so llibru, enantes de llanzase a rellatar la epopeya que protagonicen el “Engelen” y el nietu de los Reis Católicos. 

L'historiador Javier López Martín, énte'l bustu de Carlos I nel Muséu d'Escultura de Valladolid. | LNE

Entama too con una boda, la del rei Christian II de Dinamarca cola princesa Isabel de Habsburgo-Trastámara, la hermana del futuru emperador. Esi ye'l venceyu pol que'l “Engelen” se cedió al príncipe Carlos, y a la llarga representación de la corte flamenca que lu acompañó nel so viaxe a España al traviés del mar. Enantes participara en grandes fazañes béliques y, según Javier López, en Dinamarca ye tan popular como les carabeles de Colón ente los españoles

La hestoria del “Engelen” empieza nel estelleru de Sønderborg, y en 1510 yá se supon que ta termináu. La primer dotación de guerra del barcu taba formada por 11 artilleros y 126 soldaos, cuatro alabarderos, trés carpinteros, un clérigu, dos médicos, un carniceru y un flauteru. 

Depués de llibrar munches batalles, el Rei de Dinamarca empréstalu al so cuñáu, el príncipe Carlos, y nél embarcó nel puertu de Flesinga. Tres una travesía dedicada a la llectura, entreteníu polos sos bufones y acompañáu por un séquitu de más de siete mil persones partíes nuna flota de más de cuarenta barcos, según recueye nos sos diarios Laurent Vital, al cargu del roperu del futuru rei y, de camín, cronista de la travesía, llegaron a les mariñes asturianes. 

Nes páxines del so llibru, Javier López va recoyendo les hestories que-y salen al camín a midida qu'investiga sobre'l “Engelen” y el viaxe de Carlos I. Fala de la murnia vida de casada de la infanta Isabel, ignorada y maltratada pol rei danés, namoráu d'una moza plebeya qu'acabó asesinada con unes cereces envelenaes. Describe, con tou detalle, la celebración del capítulu de la Orde del Toisón d'Oru, que Carlos convoca enantes d'entamar el so viaxe y tomar posesión del tronu d'España

Una vegada n'España, Carlos viaxa a Valladolid a xurar en Cortes y el “Engelen” sigue hasta'l puertu de Pasajes, en San Sebastián. D'ellí tenía de salir tiempu depués pa recoyer en Santander al infante Fernando, el so hermanu, al que los Reis Católicos educaren pa que xubiera al tronu y que, nel intercambiu de príncipes impuestu polos flamencos, teníen de dir escontra los Países Baxos. 

Fernando nunca llegó a embarcar nel “Engelen”, porque la nave fundió ensin llegar a salir del puertu de Pasajes. Arde y fúndese nes sos agües, y ellí sigue. Javier López ye partidariu de la tesis que sostien que foi un sabotaxe, ordenáu polos partidarios castellanos de Fernando. L'emperador mandó que rescataren l'artillería y reflotaren el barcu, pero nunca se llego a facer. En 1937, mientres una operación pa rescatar otru barcu, fundíu na Guerra Civil, apaez una bombarda, un cañón de gran calibre, que ta nel orixe del llibru de Javier López. 

Hai, amás de toles aconceyaes pol investigador nel volume, otra hestoria más, que ye la del afayu que lu condució a siguir el rastru del “Engelen” y reconstruyir la so apasionante hestoria. Javier López, qu'estudió Xeografía y Hestoria na Universidá Complutense y doctoróse na Universidá Metropolitana de Londres, andaba somorguiáu na so tesis, sobre artillería histórica, cuando zarapicó cola bombarda que viaxó nel “Engelen” nel Muséu San Telmo de San Sebastián, en mediu del monte Urgull. “Llámome Rosita Wicke. Semo la muerte y el gañíu. Fíxome Juan Vastenove. Esto ye verdá. Añu 1502”, pudo lleer inscrito al pie d'un escudu danés. Asina supo qu'había un barcu fundíu en Pasajes y a partir d'ende, tirando del filu, refizo la hestoria del “Engelen”, del viaxe del príncipe Carlos y fixo axeitar los episodios históricos que los arrodien. 

La travesía qu'empezó entós nun acabó entá, anque yá llegó a una primer escala. Javier López investiga agora sobre la espedición de Magallanes y Elcano, y con él siguen munchos de los personaxes colos que se familiarizó al enfusase na hestoria del “Engelen”, “como si non quixeren soltame pa siguir siendo recordaos”.